02.11.2026 | 12:34
Ուկրաինական ԱԹՍ-ները գրոհել են Սամարայի մարզը․ թիրախավորվել է Եվրոպայի ամենամեծ նավթապահեստային պարկը
Օլեշկիում ավարտվել է հրադադարի ռեժիմը․ Մելանյա Թրամփը հայտնել է 800 մարդու տարհանման մասին
Քաղաքականություն
02.11.2026 | 11:44
ԱՄՆ առաջին տիկին Մելանյա Թրամփը հայտարարել է, որ ավարտվել է ուկրաինական Խերսոնի մարզի օկուպացված Օլեշկի քաղաքում հաստատված հրադադարի ռեժիմի գործողությունը։ Նա հայտնել է, որ քաղաքից հաջողվել է տարհանել շուրջ 800 մարդու, գրում է BBC-ի ռուսական ծառայությունը:
«Առաքելությունը հաջողությամբ անցել է․ տարածաշրջան է հասցվել կենսական կարևոր նշանակության օգնություն, ինչպես նաև տարհանվել է գրեթե 800 մարդ։ Ամերիկայի անունից շնորհակալություն եմ հայտնում Ռուսաստանին և Ուկրաինային՝ Օլեշկիում հրադադարի ռեժիմի շրջանակում ցուցաբերած առաջնորդության և համագործակցության համար։ Հուսով եմ, որ Օլեշկիում տեղի ունեցածը հիմք կդառնա երկու երկրների միջև կայուն խաղաղության հաստատման համար»,- գրել է նա X սոցիալական ցանցում։
Նա հավելել է, որ հրադադարի ռեժիմը գործել է 2026 թվականի հոկտեմբերի 27-ից մինչև նոյեմբերի 1-ը՝ նախապես ծրագրված ժամանակացույցին համապատասխան։
Ռուսաստանի մարդու իրավունքների պաշտպան Յանա Լանտրատովան, իր հերթին, կեսգիշերին մոտ տելեգրամի իր ալիքում հայտնել է Օլեշկիում մարդասիրական առաքելության գոտում հրադադարի ռեժիմի ավարտի մասին։ Նրա խոսքով՝ ինչպես ռուսական, այնպես էլ ուկրաինական կողմերը կատարել են իրենց ստանձնած բոլոր պարտավորությունները, ինչի շնորհիվ հաջողվել է քաղաքի բնակիչներին օգնություն հասցնել և ապահովել այն մարդկանց մեկնումը, ովքեր ցանկացել են լքել քաղաքը։
Այն մասին, որ երկու կողմերն էլ պահպանել են իրենց պարտավորությունները, X սոցիալական ցանցում հայտնել է նաև Ուկրաինայի մարդու իրավունքների պաշտպան Դմիտրի Լուբինեցը։
Ռուսաստանն ու Ուկրաինան դադարեցրել էին ռազմական գործողությունները Օլեշկիում՝ ԱՄՆ առաջին տիկին Մելանյա Թրամփի միջնորդությամբ իրականացվող մարդասիրական առաքելության համար։ Լռության ռեժիմն ուժի մեջ էր մտել հոկտեմբերի 27-ի առավոտյան։
Թարգմանությունը՝ Էմմա Չոբանյանի
