02.11.2026 | 12:00
Նեթանյահուն Թրամփից պահանջել է միջանկյալ ընտրություններից հետո վերսկսել Իրանի դեմ հարվածները․ Axios
«Բյուջեն երբեք շատ չի լինում». 3 տրլն 604 մլրդ դրամ եկամուտ՝ 2027-ի պետական բյուջեով․ ՏԵՍԱՆՅՈՒԹ
Քաղաքականություն
02.11.2026 | 11:21
Ազգային ժողովի ֆինանսավարկային և բյուջետային հարցերի մշտական հանձնաժողովում և մշտական հանձնաժողովների համատեղ նիստերում մեկնարկել են 2027 թվականի պետական բյուջեի օրենքի նախագծի նախնական քննարկումները։ Օրենսդիր մարմնում Հայաստանի Հանրապետության վարչապետ Նիկոլ Փաշինյանը ներկայացրեց առաջիկա տարվա բյուջետային ծավալները, ոլորտային հատկացումների դինամիկան և Կառավարության տնտեսական քաղաքականության հիմնարար տեսլականը։
2027 թվականի պետական բյուջեի եկամտային մասը պլանավորված է 3 տրիլիոն 604 միլիարդ դրամի չափով, ինչը համարժեք է շուրջ 10 միլիարդ ԱՄՆ դոլարին։
Կառավարության ղեկավարի գնահատմամբ՝ ցուցանիշն արտացոլում է վերջին տարիներին արձանագրված տնտեսական ակտիվության և հարկային հավաքագրումների աճի միտումները։
Փաշինյանի խոսքով՝ 2027 թվականի բյուջետային նախագծով նախատեսվում է ֆինանսավորման էական աճ ինչպես կապիտալ ծրագրերի, այնպես էլ կրթության, գիտության և համայնքային զարգացման ուղղություններով։
«Բյուջեն ընդհանրապես շատ երբեք չի լինում։ Աշխարհում երբեք գոյություն չի ունեցել և գոյություն չի ունենալու մի երկիր, որը կանգնի ասի՝ իմ բյուջեն շատ է։ Ինչքան մեծանում է բյուջեն, այնքան ավելի մեծանում են կարիքները, ծախսերը և ակնկալիքները»,- ընդգծեց վարչապետը։
Կառավարության ղեկավարն շեշտեց, որ պետական բյուջեն ձևավորվում է Հայաստանի քաղաքացիների և ռեզիդենտների համախառն աշխատանքի արդյունքում, և պետության դերն է ապահովել ազատ մրցակցային աշխատանքային պայմաններ, պատշաճ հավաքագրումներ և ծախսումների արդյունավետություն։
Փաշինյանը նաև նշեց, որ 2027 թվականին 2017 թվականի համեմատ քաղաքացիներին վերադարձվող եկամտային հարկի ծավալը պլանավորված է 4895 %-ով ավելի (կամ 61,5 անգամ աճ)։ 2025-ին հիփոթեքային ծրագրով քաղաքացիներին վերադարձվել է 95 միլիարդ դրամ (շուրջ 263 միլիոն ԱՄՆ դոլար)։
Այս տարի վերադարձված եկամտային հարկի ծավալն արդեն հասել է 78,6 միլիարդ դրամի։
Մանրամասները՝ տեսանյութում։
Անի Թամրազյան
