ՌԴ-ում և Ուկրաինայում հաքերները կոտրել են օդային տագնապի, արտակարգ իրավիճակների մասին ծանուցման հավելվածները

Ուկրաինայի պաշտոնական «Օդային տագնապ» հավելվածը, որն օգտագործվում է բնակչությանը հնարավոր սպառնալիքների մասին նախազգուշացնելու համար, նոյեմբերի 1-ի երեկոյան կիբերհարձակման է ենթարկվել։ Օգտատերերը սկսել են կեղծ ծանուցումներ ստանալ ճառագայթային և քիմիական վտանգի, ինչպես նաև Կիևի փողոցներում հնարավոր մարտերի սպառնալիքի վերաբերյալ, գրում է DW-ի ռուսական ծառայությունը։

Միջադեպին առաջինն արձագանքել են Ուկրաինայի ռազմաօդային ուժերը։ Զինվորականները հայտարարել են, որ հավելվածը, հավանաբար, ենթարկվել է «թշնամական միջամտության»՝ վստահեցնելով, որ ճառագայթային վտանգ չկա։ Ուկրաինայի արտակարգ իրավիճակների պետական ծառայությունից հայտնել են, որ համապետական ազդարարման համակարգն աշխատում է բնականոն ռեժիմով, իսկ սպառնալիքների վերաբերյալ բոլոր ազդանշանները փոխանցվում են մարզային վարչակազմերին և փողոցային ազդարարման համակարգերին։

Ավելի ուշ հավելվածը մշակողները հաստատել են այն կոտրելու փաստը։

«Այսօր կողմնակի անձինք իրականացրել են չարտոնված միջամտություն հավելվածի աշխատանքին։ Մենք անջատել ենք push ծանուցումները և ժամանակավորապես դադարեցրել հավելվածի աշխատանքը»,- հայտնել են նրանք տելեգրամի միջոցով՝ օգտատերերին կոչ անելով չբացել կասկածելի ծանուցումներում տեղադրված հղումները։

Նոյեմբերի 2-ի գիշերը մշակողների թիմը տեղեկացրել է կիբերհարձակումից հետո ծառայության աշխատանքի աստիճանական վերականգնման մասին։ Նրանց տվյալներով՝ օգտատերերը կրկին սկսել են ստանալ օդային տագնապի մասին ծանուցումներ, թեև որոշ գործառույթներ ժամանակավորապես շարունակել են անհասանելի մնալ։ Մշակողները նաև նշել են, որ հավելվածը չի պահպանում օգտատերերի անձնական տվյալները, և որ ձեռնարկվում են լրացուցիչ միջոցառումներ կիբերպաշտպանությունն ուժեղացնելու ուղղությամբ։

Հաքերային հարձակման մասին գրեթե միաժամանակ հայտնել է նաև Ռուսաստանի արտակարգ իրավիճակների նախարարությունը։ Հաղորդվել է, որ գերատեսչության բջջային հավելվածը ենթարկվել է «զանգվածային կիբերհարձակման», որի հետևանքով չարագործներն օգտատերերին կեղծ հաղորդագրություններ են ուղարկել, իբր, Ռուսաստանի ուղղությամբ արձակված միջուկային մարտագլխիկների մասին։ ԱԻՆ-ի տվյալներով՝ մասնագետներն աշխատում են համակարգում առկա խոցելիությունը վերացնելու և ծառայության բնականոն աշխատանքը վերականգնելու ուղղությամբ։

Թարգմանությունը՝ Էմմա Չոբանյանի