Թուրքիայի ընդդիմությունը հայտնել է՝ ով կլինի նախագահի իրենց թեկնածուն, եթե Ստամբուլի քաղաքապետը չկարողանա առաջադրվել

Թուրքիայի գլխավոր ընդդիմադիր Ժողովրդահանրապետական կուսակցության (CHP) նախագահ Օզգյուր Օզելը հայտարարել է, որ Անկարայի քաղաքապետարանի «համերգի» հետաքննության հետ կապված վերջին գործողությունները քաղաքական դրդապատճառներ ունեն՝ նպատակ ունենալով խաթարել քաղաքապետ Մանսուր Յավաշին և CHP-ին։ Նա նշել է, որ Յավաշը ներկայում հարցումներում առաջատար է նախագահ Ռեջեփ Թայիփ Էրդողանին։

«Եթե Էքրեմ Իմամօղլուն նախագահի թեկնածու չէ կամ չի կարող լինել, Յավաշն ամենաուժեղ այլընտրանքն է»,- հայտարարել  է նա, փոխանցում է Turkiye Today-ը։

Օզելը նշել է, որ CHP-ն տեղյակ է դատական ​​​​գործընթացների խիստ քաղաքականացման մասին՝ պնդելով, որ կուսակցությունն ունի դատական ​​​​խախտումների վերաբերյալ էական ապացույցներ:

«Մենք դրանց մի մասը ներկայացրել ենք Բարձրագույն ընտրական խորհրդին (YSK): Մենք չենք սպասում դատվելուն. մենք սպասում ենք պատասխանատվության ենթարկելու մեղադրական եզրակացությունը կազմածներին»,- հայտարարել է նա։

Օզելը նաև ընդգծել է, որ Ստամբուլում և Անկարայում հետաքննությունները քաղաքական դրդապատճառներ ունեն և ուղղված չեն իրական խախտումների բացահայտմանը: Հաշվեքննիչ դատարանի և ներքին տեսուչների կողմից նախորդ աուդիտները հաստատել են, որ քաղաքապետարանի աշխատակիցների շրջանում որևէ խախտում չի հայտնաբերվել:

Մեկնաբանելով կուսակցական հարցումները՝ Օզելը նշել է, որ վերջին հարցումները ցույց են տալիս, որ մեծանում է CHP-ի առավելությունը իշխող «Արդարություն և զարգացում» կուսակցության (AKP) նկատմամբ։

«Եթե մարդիկ իսկապես հավատային, որ այս գործընթացներն օրինական են, կուսակցությունը դժվարություններ կունենար։ Քաղաքացիներն աջակցում են CHP-ին, քանի որ հարձակումները համարում են անարդար։ Բոլոր սոցհարցումները հաստատում են այս միտումը»,- հայտարարել է նա։

Հավելենք, որ օրերս Անկարայի քաղաքապետարանում 2021-2024 թվականներին համերգների ծախսերի հետ կապված կոռուպցիոն հետաքննության շրջանակում 13 մարդ էր ձերբակալվել։

Թարգմանությունը՝ Էմմա Չոբանյանի