ՌԴ-ում քաղաքացիական օդանավի և ԱԹՍ-ի բախման առաջին դեպքն է տեղի ունեցել

Ռուսաստանը գրանցել է քաղաքացիական ինքնաթիռի և անօդաչու թռչող սարքի առաջին բախումը: Այս մասին հայտնում է ՌԲԿ-ն, փոխանցում է Meduza-ն։

Միջադեպը տեղի է ունեցել օգոստոսի 2-ին Կամչատկայում, երբ Կամչատկայի ավիացիոն ձեռնարկության կողմից շահագործվող Ան-26 ինքնաթիռը Պետրոպավլովսկից դեպի Տիլիչկի կանոնավոր չվերթ էր իրականացնում։

Վայրէջքից հետո օդանավակայանի տեխնիկները ինքնաթիռում հայտնաբերել են 11 սանտիմետր խորությամբ փոս։ Սկզբում անձնակազմը ենթադրել է, որ թռիչքի ժամանակ թռչունի հետ բախում է տեղի ունեցել։ Հետագայում Ռոսավիացիայի կողմից  անցկացված հետաքննությունը բացառել է այս հնարավորությունը և եզրակացրել, որ վնասը պատճառվել է «անհայտ օբյեկտի, ամենայն հավանականությամբ, անօդաչու թռչող սարքի» հետ բախման հետևանքով։ Այլ մանրամասներ հայտնի չեն։

Ինքնաթիռում 28 մարդ է եղել, երբ այն բախվել է անօդաչու թռչող սարքին, հայտնում է մասնագիտակցված «Авиаторщина» կայքը։ Ոչ ոք չի տուժել։ Վնասված ինքնաթիռն այժմ բնականոն կերպով աշխատում է։

Պատերազմի սկսվելուց ի վեր Ռուսաստանի շատ շրջաններում արգելվել է մասնավոր անօդաչու թռչող սարքերի շահագործումը: Կամչատկայում արգելվում է անօդաչուների թռիչքը բնակեցված տարածքների և էներգետիկ օբյեկտների վրայով։

Պորտալն ընդգծում է, որ Ռուսաստանի եվրոպական մասում ուկրաինական անօդաչու թռչող սարքերի հարձակումների հաճախականության աճի պատճառով վերջերս քաղաքացիական օդանավակայանների գործունեությունը պարբերաբար դադարեցվում է: Ռոսավիացիան յուրաքանչյուր նման կասեցման պատճառ է նշում «թռիչքների անվտանգությունը»:

Թարգմանությունը՝ Էմմա Չոբանյանի