20.08.2026 | 12:34
Օլիմպավանում, ըստ ՊԵԿ-ի, հարկային խոշոր խախտումներ են արձանագրվել․ շուրջ 2 մլրդ դրամի վնաս է պատճառվել․ ՏԵՍԱՆՅՈՒԹ
Ալիևի հատուկ ներկայացուցիչը խոսել է «ՀՀ Սահմանադրությունից բխող խնդրից» և TRIPP-ն անվանել «խաղաղության նախագիծ»
Քաղաքականություն
23.09.2025 | 14:55
Անցյալ ամիս Վաշինգտոնում Ադրբեջանի և Հայաստանի միջև խաղաղության պայմանագրի նախաստորագրումից հետո մենք մտնում ենք Հարավային Կովկասի տարածաշրջանում նոր պատմական դարաշրջան։ Այս մասին ավիստրիական Austria Press Agency-ին տված հարցազրույցում հայտարարել է Ադրբեջանի նախագահի հատուկ հանձնարարությունների գծով հատուկ ներկայացուցիչ Էլչին Ամիրբեկովը, փոխանցում են ադրբեջանական լրատվամիջոցները։
Ամիրբեկովը կրկնել է Բաքվի դժգոհությունները ՀՀ Սահմանադրության հետ կապված, մասնավորապես, թե Սահմանադրության նախաբանում «տարածքային պահանջներ կան Ղարաբաղի վերաբերյալ»։
«Ստորագրվող խաղաղության պայմանագիրը ենթադրում է տարածքային պահանջներից փոխադարձ հրաժարում»,- նշել է Ամիրբեկովը։
Նա նաև ասել է, որ տարածաշրջանում երկարաժամկետ խաղաղության և կայունության հսկայական հնարավորություններ կան։ Ամիրբեկովը կարևոր քայլ է համարել այս ուղղությամբ 43 կիլոմետրանոց ճանապարհի և երկաթուղու կառուցումը, որն անցնում է Հայաստանով և կապում է Ադրբեջանը Նախիջևանի հետ։
«Խոսքը միայն Ադրբեջանի երկու մասերի վերամիավորման մասին չէ, այլ նաև Հայաստանի և Ադրբեջանի, ինչպես նաև Ասիայի և Եվրոպայի միացման մասին է»,- ասել է նա։
Ըստ ադրբեջանական լրատվամիջոցների՝ «Զանգեզուրի միջանցք» անվանվող, սակայն Վաշինգտոնում «Թրամփի բարգավաճման և խաղաղության ուղի» անվանումով նախագիծն Ամիրբեկովը «խաղաղության նախագիծ» է կոչել։
«Սա խաղաղության նախագիծ է, որը քաղաքական կամքի դեպքում կարող է օգուտ բերել տարածաշրջանի բոլորին»,- մեկնաբանել է Էլչին Ամիրբեկովը Իրանի քննադատությունը։
Հավելենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները շարունակում են «միջանցք» եզրույթն օգտագործել՝ խեղաթյուրելով ստորագրված փաստաթղթերի բովանդակությունը։
Թարգմանությունը՝ Էմմա Չոբանյանի
