Կանադան պաշտոնապես ճանաչեց Պաղեստին պետությունը

Կանադան կիրակի օրը հանդես է եկել հայտարարությամբ՝ պաշտոնապես ճանաչելով Պաղեստին պետությունը, ինչը էական շրջադարձ է երկրի արտաքին քաղաքականության մեջ։ Նախկինում Կանադան ասում էր, որ նման ճանաչում կկատարվի միայն Իսրայելի և Պաղեստինի ղեկավարների միջև բանակցված խաղաղության համաձայնագրից հետո, հայտնում է The globe and mail-ը։

Հայտարարությունում վարչապետ Մարկ Քարնին ասել է, որ Կանադան այլևս չի կարող սպասել, քանի որ «երկու պետություն» լուծման կենսունակությունը քայքայվում է։

«Իսրայելի ներկայիս կառավարությունը մեթոդական կերպով աշխատում է՝ կանխելու Պաղեստին պետության ստեղծման հնարավորությունը», -ասել է Քարնին։

Նա հավելել է, որ այժմ Իսրայելի կառավարության բացահայտ քաղաքականությունն է՝ «ոչ մի պաղեստինյան պետություն»․ «Այս համատեքստում է, որ Կանադան ճանաչում է Պաղեստին պետությունը և առաջարկում է իր միջնորդությունը՝ կառուցելու խաղաղ ապագայի հույսը ինչպես Պաղեստին պետության, այնպես էլ Իսրայել պետության համար»։

Կանադայի այս որոշումը համընկնում է Ֆրանսիայի և Մեծ Բրիտանիայի նմանատիպ քայլերի հետ՝ երկրներ, որոնք նույնպես ճանաչում են Պաղեստին պետությունը։ Դրանք բոլորը G7 խմբի անդամներ են, ինչը մեծացնում է միջազգային աջակցությունը Պաղեստինի՝ պետություն դառնալու ձգտմանը։

Ավստրալիան և Բելգիան նույնպես ակնկալվում է, որ ճանաչման մասին կհայտարարեն ՄԱԿ-ի Գլխավոր ասամբլեայի այս շաբաթ կայանալիք նստաշրջանից առաջ կամ դրա ընթացքում Նյու Յորքում։

Քարնին նաև մերժել է այն տեսակետը, որ Պաղեստինի ճանաչումը օգնում է ՀԱՄԱՍ-ին․ «Պաղեստին պետության ճանաչումը, որն առաջնորդում է Պաղեստինյան Ինքնավարությունը, զորացնում է նրանց, ովքեր ձգտում են խաղաղ համակեցության և ՀԱՄԱՍ-ի վերջի։ Սա որևէ կերպ չի արդարացնում ահաբեկչությունը և ոչ էլ պարգև է դրա համար»։

ԱՄՆ-ը Թրամփի նախագահության օրոք կտրուկ դեմ է եղել Պաղեստինի ճանաչմանը, պնդելով, որ դա օգնում է ՀԱՄԱՍ-ին և խափանում խաղաղության հնարավորությունը։ Անցած ամիս ԱՄՆ-ը չեղարկել էր վիզան, որը պետք է հնարավորություն տար Պաղեստինի նախագահ Մահմուդ Աբբասին մասնակցել այդ համաժողովին։ Նա ելույթ կունենա տեսակապով։