30.07.2026 | 17:41
Օդեսայի ափերի մոտ ադրբեջանցիներով ևս մեկ նավ է հարձակման ենթարկվել
Ազատ արձակեք ՀՀ-ի կապերի մեջ մեղադրվող Բահրուզ Սամեդովին և Իքբալ Աբիլովին․ Amnesty International-ը՝ Ալիևին
17.09.2025 | 22:38
Amnesty International միջազգային իրավապաշտպան կազմակերպությունն արշավ է սկսել բանտարկված ադրբեջանցի հետազոտողներ Բահրուզ Սամեդովի և Իքբալ Աբիլովի ազատ արձակման համար։ Կազմակերպությունը նպատակ ունի ուշադրություն հրավիրել երիտասարդ հետազոտողների բանտարկության վրա՝ ճնշում գործադրելով ինչպես երկրի ներսում, այնպես էլ միջազգային մակարդակով, փոխանցում են ադրբեջանական լրատվամիջոցները։
Կազմակերպությունը կոչ է արել նամակներ գրել Ադրբեջանի նախագահ Իլհամ Ալիևին՝ որպես արշավի մաս։ Amnesty International-ը Բահրուզ Սամեդովի և Իքբալ Աբիլովի նկատմամբ քրեական հետապնդումն ու դատապարտումը համարում է Ադրբեջանում քննադատների, գիտնականների և մարդու իրավունքների պաշտպանների դեմ շարունակվող բռնաճնշումների արշավի մի մաս։
«Այս անձինք թիրախավորվել են պարզապես իրենց խաղաղ արտահայտման ազատության իրավունքն իրացնելու համար: Իքբալ Աբիլովի և Բահրուզ Սամեդովի երկարատև ազատազրկման դատավճիռները նախատեսված են ակադեմիական քննադատությունը լռեցնելու և նրանց քաղաքականապես զգայուն հարցերից հեռացնելու համար»,- հայտարարել է կազմակերպությունը։
Amnesty International-ը պահանջում է, որ Ադրբեջանի իշխանություններն անհապաղ և անվերապահորեն ազատ արձակեն երկու գիտնականներին։
«Ապահովեք, որ նրանք ազատ արձակվելուց առաջ ստանան համարժեք բժշկական օգնություն և թույլ տվեք օմբուդսմենին ու անկախ դիտորդներին այցելել կալանավայրեր։ Միևնույն ժամանակ, մենք պահանջում ենք անհապաղ դադարեցնել լրագրողների, ակտիվիստների և խաղաղ քննադատների նկատմամբ բռնաճնշումները Ադրբեջանում և լիովին պահպանել մարդու իրավունքների վերաբերյալ միջազգային պարտավորությունները։ Ադրբեջանի իշխանությունները շարունակում են չարաշահել քրեական արդարադատության համակարգը՝ մարդու իրավունքների և խոսքի ազատության վերաբերյալ քննադատական տեսակետներն ու գիտական հետազոտությունները ճնշելու համար»,- ասվում է կազմակերպության հայտարարությունում։
Բահրուզ Սամեդովը 2025 թվականի հունիսին դատապարտվել է 15 տարվա ազատազրկման՝ «պետական դավաճանության» մեղադրանքով։ Սամեդովը մեղադրվել է, իբր, Հայաստանի հետախուզական գործակալությունների հետ համագործակցելու մեջ։ Իքբալ Աբիլովը 2025 թվականի մայիսին դատապարտվել է 18 տարվա ազատազրկման՝ «պետական դավաճանության» և «էթնիկ ատելություն հրահրելու» մեղադրանքներով։ Գիտնականը հայտնի է թալիշների լեզվի, պատմության և մշակույթի պահպանման ուղղությամբ աշխատանքով։ Նրան նույնպես մեղադրում են, իբր, ՀՀ-ի հետ գործակցելու մեջ։
Երկուսն էլ հերքում են մեղադրանքները՝ հայտարարելով, որ իրենց ձերբակալությունները քաղաքական դրդապատճառներ ունեն։
Թարգմանությունը՝ Էմմա Չոբանյանի
