24.06.2026 | 02:07
ԱԱ-2026. Անգլիան ոչ-ոքի խաղաց Գանայի հետ. ՏԵՍԱՆՅՈՒԹ
Իսրայելի և Սիրիայի ներկայացուցիչները հանդիպում կանցկացնեն Բաքվում
Քաղաքականություն
17.09.2025 | 21:46
Սեպտեմբերի 18-ին Իսրայելի և Սիրիայի ներկայացուցիչների միջև անվտանգության հարցերով հանդիպում կանցկացվի Բաքվում։ Այս մասին հայտնում են ադրբեջանական լրատվամիջոցները՝ վկայակոչելով Sky News Arabia-ին։
Հաղորդվում է նաև, որ սեպտեմբերի 17-ին, Լոնդոնում կկայանա Իսրայելի ռազմավարական պլանավորման նախարար Ռոն Դերմերի և Սիրիայի արտաքին գործերի նախարար Ասադ ալ-Շիբանիի հանդիպումը, որի ընթացքում կողմերը կքննարկեն անվտանգության վերաբերյալ առաջարկվող համաձայնագիրը։ Բանակցություններին կմասնակցի նաև ԱՄՆ հատուկ դեսպան Թոմ Բարաքը։ Սա այս ձևաչափով երրորդ եռակողմ հանդիպումը կլինի։
Axios-ը, հղում անելով տեղեկացված աղբյուրներին, հաղորդել էր, որ Իսրայելը Սիրիային ներկայացրել է նոր անվտանգության համաձայնագրի առաջարկ, որը հիմնված կլինի 1979 թվականի իսրայելա-եգիպտական խաղաղության համաձայնագրի վրա։
«Իսրայելը Սիրիային ներկայացրել է նոր անվտանգության համաձայնագրի մանրամասն առաջարկ, որը ներառում է Դամասկոսի հարավ-արևմուտքից մինչև Իսրայելի հետ սահմանը ընկած տարածքի քարտեզը»,- ասվում է հոդվածում։
Իսրայելի առաջարկի համաձայն՝ Դամասկոսից հարավ-արևմուտք գտնվող տարածքը կբաժանվի երեք գոտիների, որտեղ սիրիական կողմը կկարողանա պահպանել ուժերի և զենքի տարբեր մակարդակներ՝ կախված շրջանից։
Կան նաև հետևյալ պայմանները․ անվտանգության գոտու ընդլայնում սիրիական կողմից 2 կմ-ով, զորքերի և ծանր զինամթերքի բացակայություն անվտանգության գոտուն հարակից և Իսրայելի հետ սահմանին ամենամոտ գոտում՝ սիրիական կողմից։ Այնտեղ հնարավոր կլինի տեղակայել միայն Սիրիայի ոստիկանության և ներքին անվտանգության ուժեր, Դամասկոսից հարավ-արևմուտք՝ մինչև Իսրայելի հետ սահմանը, ամբողջ տարածքը հայտարարվելու է սիրիական ինքնաթիռների համար ոչ թռիչքային գոտի։
Փոխարենը իսրայելական կողմն առաջարկել է իր զորքերի աստիճանական դուրսբերում Սիրիայի տարածքից՝ բացառությամբ ռազմավարական առումով կարևոր Հերմոն լեռան գագաթի։ Ավելին, առաջարկի հիմնական կետերից մեկը Սիրիայով դեպի Իրան օդային միջանցքի պահպանումն է, «որը թույլ կտար Իսրայելին ապագայում հարվածներ հասցնել Իսլամական Հանրապետությանը»։
Հավելենք, որ այս տարվա հուլիսին ևս լրատվամիջոցները հայտնել էին, որ Սիրիայի հարցով բանակցություններ կանցկացվեն Բաքվում, և իսրայելական պատվիրակությունն այդ նպատակով մեկնում է Ադրբեջան։
Թարգմանությունը՝ Էմմա Չոբանյանի
