Ուկրաինական հետախուզությունը պնդում է, որ պայթյուններ է իրականացրել Վլադիվոստոկի զորամասի մոտ

Ուկրաինայի ՊՆ գլխավոր հետախուզական վարչությունը հայտնել է, որ դիվերսիա է իրականացրել ռուսական Պրիմորիեի երկրամասի Վլադիվոստոկի արվարձանում գտնվող Շչիտովայա գյուղի տարածքում, որտեղ տեղակայված է 155-րդ առանձին ծովային հետևակի գվարդիական բրիգադի 47-րդ առանձին օդադեսանտային գրոհային գումարտակը, գրում է Current time-ը։

Գերատեսչությունը նշել է, որ այս ստորաբաժանումը մասնակցել է Կիևի, Ուգլեդարի, Մարիուպոլի մոտակայքում, ինչպես նաև Կուրսկի և Պոկրովսկի ուղղություններում իրականացվող ռազմական գործողություններին և աչքի է ընկել տեղի բնակչության նկատմամբ առանձնահատուկ դաժանությամբ և ուկրաինացի գերիների մահապատժով։

Ուկրաինական հետախուզության աղբյուրի խոսքով՝ սեպտեմբերի 16-ին ժամը 9-ին, զորամասի կայանատեղիում տեղի է ունեցել հզոր պայթյուն, ապա՝ ևս մեկը։ Պայթյունների վայր են բերվել մեծ քանակությամբ տեխնիկա և հատուկ ծառայություններ։ Շչիտովայա գյուղի մուտքի մոտ վարչական շենքերի և կայանատեղիների մոտ գտնվող տարածքը շրջափակվել է։ Տարածքում երթևեկությունը մասամբ փակվել է, իրավապահ մարմինների աշխատակիցները ստուգել են բոլոր մեքենաները։

Տեղական լրատվամիջոցները հաստատել են միջադեպի մասին տեղեկությունը, անվտանգության ուժերի և հրշեջների ժամանումը և տարածքի շրջափակումը: Սակայն նրանք, հղում անելով Պրիմորիեի հակաահաբեկչական հանձնաժողովին, պնդում են, որ պատճառը «բնորոշ պայթյունների շարքն էր, որը, ենթադրաբար, առաջացել է գազային սարքավորումների օգտագործման անսարքության կամ խախտումների պատճառով» (Պրիմորիեում որոշ մեքենաներ աշխատում են բենզինով):

«Միջադեպի հետևանքով տուժածներ չկան, գրանցվել է միայն մի քանի մեքենաների աննշան վնաս»,- պնդում են տարածաշրջանի իշխանությունները։

Ուկրաինական կողմը հայտնել է, որ իրենց հայտնի է պայթյունների հետևանքով զոհերի և վիրավորների մասին։

Թարգմանությունը՝ Էմմա Չոբանյանի