07.09.2026 | 15:57
Հայաստանն ու Վրաստանը քննարկել են նոր ուղիղ ավիաչվերթների բացումը
ՄԱԿ Գլխավոր ասամբլեայի նախագահը չի բացառել խաղաղապահների մուտքը Ուկրաինա
Քաղաքականություն
14.09.2025 | 11:25
ՄԱԿ-ի խաղաղապահ ուժերի մասնակցությունը կարող է դառնալ Ուկրաինայում պատերազմի ապագա կարգավորման մի մաս, կարծում է ՄԱԿ-ի Գլխավոր ասամբլեայի նոր նախագահ Անալենա Բերբոկը, փոխանցում է DW-ն։
«Եթե հարցը հասնի խաղաղության պայմանագրին, ապա այն պետք է հնարավորինս լավ պաշտպանվի։ Իսկ եթե անդամ պետությունների մեծ մասը հայտարարի, որ դրա համար անհրաժեշտ են կապույտ սաղավարտները, ապա դա կարող է երկարաժամկետ խաղաղություն ապահովել»,-ասել է Գերմանիայի ԱԳՆ նախկին ղեկավարը Bild am Sonntag շաբաթաթերթին տված հարցազրույցում, որը հրապարակվել է կիրակի օրը՝ սեպտեմբերի 14-ին։
Բերբոկը ընդգծել է, որ նախևառաջ պետք է սկսել խաղաղ բանակցությունները։ Ուկրաինայի դաշնակիցները արդեն մի քանի ամիս քննարկում են հնարավոր հրադադարի կամ խաղաղության պայմանագրի ամրապնդման տարբերակները, սակայն Ռուսաստանը առայժմ չի ցույց տալիս երկխոսության պատրաստակամություն։
Հիշեցնենք՝ Ուկրաինան 2022 թվականի փետրվարից դիմագրավում է Ռուսաստանի լայնամասշտաբ զինված ներխուժմանը։ Կիևը պնդում է, որ հրադադարի կամ պատերազմի դադարեցման դեպքում երկրին անհրաժեշտ կլինեն հստակ անվտանգության երաշխիքներ։ Ռազմական փորձագետներն ու գիտնականները կարծում են, որ դրա համար կպահանջվեն հարյուր հազարավոր զինծառայողներ, օրինակ՝ եվրոպական դաշնակիցներից։ Որպես այլընտրանք դիտարկվում է ՄԱԿ-ի խաղաղապահների առաքելությունը։
Անցած շաբաթ Անալենա Բերբոկը պաշտոնապես ստանձնել է ՄԱԿ-ի Գլխավոր ասամբլեայի նախագահի պաշտոնը։ Այս պաշտոնը հիմնականում ունի արարողակարգային նշանակություն՝ ի տարբերություն ՄԱԿ-ի գլխավոր քարտուղար Անտոնիու Գուտերեշի լիազորությունների։ Բերբոկի մանդատը կտևի մեկ տարի։
