31.05.2026 | 20:00
չԾխելու ՇԵՐՏԵՐԸ. ինչպես է շրջանցվում արդեն 6 տարի գործող օրենքը․ ՏԵՍԱՆՅՈւԹ
Զանգվածային հարված Ուկրաինային․ ՌԴ-ն 415 ԱԹՍ և 43 հրթիռ է արձակել
Քաղաքականություն
10.09.2025 | 13:32
Ռուսական բանակը սեպտեմբերի 10-ի գիշերը Ուկրաինայի ուղղությամբ 415 անօդաչու թռչող սարք և 43 հրթիռ է արձակել, այդ թվում՝ «Իսկանդեր-Մ» բալիստիկ հրթիռ։ Այս մասին հայտնել է Ուկրաինայի ռազմաօդային ուժերը, գրում է Current time-ը։
Ուկրաինայի նախագահ Վլադիմիր Զելենսկին հայտարարել է, որ ռուս զինվորականները հարվածել են Խմելնիցկիի մարզի Վոլոչիսկում կարի արտադրամասին։ Այս պահին հայտնի է երեք վիրավորի մասին։
«Սա այսօրվա ռուսական զանգվածային հարվածի վայրերից միայն մեկն է. մոտ 415 տարբեր տեսակի ԱԹՍ և ավելի քան 40 թևավոր և բալիստիկ հրթիռ։ Մեր 15 շրջանները ենթարկվել են հարձակման։ Ցավոք, Ժիտոմիրի շրջանում մեկ մարդ է զոհվել», – նշել է նա։
Ժիտոմիրի մարզի ռազմական վարչակազմի ղեկավար Վիտալի Բունեչկոն հայտնել է, որ նաև մեկ վիրավոր կա, վնասվել են մի քանի քաղաքացիական ձեռնարկություններ և մասնավոր տներ: Հարձակման հետևանքները վերացվում են:
Ուկրաինայի արտակարգ իրավիճակների պետական ծառայության տվյալներով՝ Վիննիցայում քաղաքացիական և արդյունաբերական ենթակառուցվածքների վրա ռուսական հարվածի հետևանքով մեկ մարդ վիրավորվել է։ Ավելի քան 20 բնակելի շենքերում կոտրվել են պատուհանները և վնասվել տանիքներ։
Վոլինի մարզի Լուցկի շրջանում արտակարգ իրավիճակների պետական ծառայության փրկարարները մարել են ռուսական հարձակումից հետո ձեռնարկությունում բռնկված խոշոր հրդեհը։
«Փրկարարների ժամանման պահին հրդեհի մակերեսը կազմել է 1000 քառակուսի մետր։ Հրշեջները աշխատել են մի քանի ժամ։ Հրդեհը հաջողվել է մարվել առավոտյան»,- ասվում է հաղորդագրության մեջ։
Թարգմանությունը՝ Էմմա Չոբանյանի
