07.12.2025 | 14:58
Ձյուն և ձնախառն անձրև․ օդի ջերմաստիճանը զգալի կնվազի
Ֆրանսիայի խորհրդարանն անվստահություն է հայտնել Ֆրանսուա Բայրուի կառավարությանը
Քաղաքականություն
08.09.2025 | 21:57
Ֆրանսիայի Ազգային ժողովը երկուշաբթի երեկոյան քվեարկել Է Ֆրանսուա Բայրուի կառավարությանն անվստահություն հայտնելու օգտին, և այժմ նա ստիպված կլինի հրաժարական տալ: BBC-ի ռուսական ծառայության փոխանցմամբ՝ նրան պաշտոնից հեռացնելու և փոքրամասնության կառավարությունը լուծարելու օգտին քվեարկել է 364 պատգամավոր, դեմ՝ 194, ձեռնպահ՝ 25:
Ֆրանսիայի ծայրահեղ աջ ընդդիմությունը պահանջում է արտահերթ խորհրդարանական ընտրություններ, ծայրահեղ ձախ ընդդիմությունը՝ նախագահ Մակրոնի հրաժարականը։
Ֆրանսիացի քաղաքական գործիչներն ու ԶԼՄ-ները կառավարությանը վստահության հարցը խորհրդարանի քննարկմանը դնելու Բայրուի որոշումը համարում են «ինքնասպան», շատերն այն բնութագրում են որպես «քայլ դեպի դատարկություն»: Հինգերորդ հանրապետության պատմության մեջ առաջին անգամ խորհրդարանի վստահությունը ձեռք բերած վարչապետը հրաժարական կտա անվստահության քվեի միջոցով, գրում է Figaro-ն:
Կառավարությանը անվստահության քվե են հայտնել ոչ միայն ծայրահեղ աջակողմյան «Ազգային միավորումը» և ծայրահեղ ձախակողմյան «Անհնազանդ Ֆրանսիան», այլև սոցիալիստները։
«Երկուշաբթի մենք դեմ կքվեարկենք, քանի որ վստահությունը վաղուց է խարխլվել, իսկ բյուջեի նախագիծը, որը Բայրուն ներկայացրել է ֆրանսիացի ժողովրդին, շատ անարդար բյուջե է:
Ես, անշուշտ, աջակցում եմ դեֆիցիտի կրճատման գաղափարին, բայց դա չի կարող հասնել այն գնով, թե ինչ են վճարելու վարձու աշխատողները, հիվանդները, գործազուրկները, թոշակառուները և երիտասարդները, որոնք կդառնան Բայրուի ծրագրի զոհերը»,- սեպտեմբերի 4- ին հայտարարել է սոցիալիստների առաջնորդ, կուսակցության առաջին քարտուղար Օլիվյե Ֆորը:
