07.12.2025 | 20:49
Կարծում եմ ճիշտ կլինի, որ կիրակնօրյա պատարագներից առաջ եկեղեցիներում երգչախմբերը կատարեն օրհներգը․ Փաշինյան
Իսպանիան Իսրայելի նկատմամբ զենքի էմբարգո է սահմանել, հետ կանչել իր դեսպանին
Քաղաքականություն
08.09.2025 | 22:34
Իսպանիան երկուշաբթի օրը հետ է կանչել Թել Ավիվում իր դեսպանին, այն բանից հետո, երբ Իսրայելի արտաքին գործերի նախարար Գիդեոն Սաարը քննադատել է Իսպանիայի վարչապետ Պեդրո Սանչեսին Իսրայելի դեմ ուղղված մի շարք գործողությունների համար, գրում է France 24-ը։ Սանչեսը խոսել էր այն միջոցառումների մասին, որոնք ուղղված են «Գազայում ցեղասպանությունը» դադարեցնելուն։ Իսրայելը հակադարձել էր՝ արգելելով երկու իսպանացի նախարարների մուտքը երկիր։
Իսպանիայի արտաքին գործերի նախարարությունը դատապարտել է Իսրայելի արձագանքը՝ նշելով, որ Մադրիդը «չի վախենա խաղաղության, միջազգային իրավունքի և մարդու իրավունքների պաշտպանության հարցում»։
Իսրայելի արտաքին գործերի նախարար Գիդեոն Սաարը X – ում նշել է, որ Սանչեսի կողմից պատերազմի քննադատությունը փորձ է «ուշադրությունը լուրջ կոռուպցիոն սկանդալներից շեղելու՝ Իսրայելի և հակասեմականության դեմ շարունակական արշավի միջոցով»։
Սաարը նաև հայտարարել է Իսպանիայի փոխվարչապետ Յոլանդա Դիասի և երիտասարդության հարցերով նախարար Սիրա Ռեգոյի մուտքի արգելքի մասին, որոնք երկուսն էլ Սանչեսի կոալիցիոն կառավարության կրտսեր գործընկեր «Սումար» ծայրահեղ ձախակողմյան խմբի անդամներ են։
Ռեգոն հոր կողմից պաղեստինյան ծագում ունի և վաղ մանկության մի մասն անցկացրել է օկուպացված Արևմտյան ափին։
Սանչեսի կողմից հայտարարված միջոցառումների թվում են Իսրայելի նկատմամբ զենքի էմբարգոյի սահմանումը և իսրայելական բանակի համար վառելիք տեղափոխող նավերի կողմից իսպանական նավահանգիստների օգտագործման արգելքը։
Իսպանիան Իսրայելի կողմից Գազայում սանձազերծված ավերիչ պատերազմի ամենաակտիվ քննադատներից մեկն է Եվրոպայում. Մադրիդն անցյալ տարի ճանաչել է նաև Պաղեստին պետությունը։
Թարգմանությունը`Էմմա Չոբանյանի
