Հասարակություն
08.09.2025 | 13:04
Աբովյան քաղաքում երեկ ողբերգական դեպք է տեղի ունեցել. Հատիսի փողոցում գտնվող արագ սննդի կետում 2 քաղաքացու են գտել կախված վիճակում։ Ինչպես տեղեկացնում է Shamshyan.com-ը՝ մահացածները հարազատ եղբայրներ են։
Armlur.am-ին դեպքի մասին որոշ մանրամասներ են հայտնի դարձել։ Մասնավորապես, ըստ լրատվամիջոցի՝ հայտնաբերվել է եղբայրներից մեկի անունից մորն ուղղված նամակ։
«Մամ ջան, կներես ինձ, ոչ մի բան չխոստանաս որևէ մեկի։ Մեղավորը ես եմ, ես սիրում եմ ձեզ, բայց չստացվեց, ապրի քո համար։ Նարեիս լավ կպահես։ Նարե ջան, կներես ինձ։ Խնդրում եմ ոստիկաններին՝ հետևողական լինեն, չվնասեն իմ 3 հրաշքներին։ Ես եմ մեղավոր, ոչ իրանք, իրանք բան չգիտեն, ու մարդիկ չար են»,- գրված է եղել նամակում։
Factor TV-ն փորձեց մանրամասներ ճշտել Քննչական կոմիտեից։
«Դեպքի առթիվ նախաձեռնվել է քրեական վարույթ՝ Քրեական օրենսգրքի 162-րդ հոդվածի 1-ին մասով (ինքնասպանության հասցնելը)։
Նշանակվել են դիակի դատաբժշկական, դատաձեռագրաբանական, դատագենետիկական փորձաքննություններ: Քրեական վարույթի նախաքննությունը շարունակվում է»,- հայտնեցին կառույցից՝ առանց այլ մանրամասներ հաղորդելու։
Թե որն էր եղել երկու եղբայրների ենթադրյալ ինքնասպանության պատճառը, ցույց կտա քննությունը։
Ռոզա Վարդանյան
