29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
WSJ․ ԵՄ-ԱՄՆ առևտրային համաձայնագիրը վտանգված է
Քաղաքականություն
07.09.2025 | 18:41
The Wall Street Journal (WSJ) թերթի տեղեկություններով՝ եվրոպական գործարար շրջանակներում աճում է դժգոհությունը ԵՄ-ԱՄՆ առևտրային համաձայնագրի պայմաններից։ ԵՄ ընկերությունները ակնկալում են փոփոխություններ նախագծում՝ այն բանից հետո, երբ Սպիտակ տունը որոշեց մետաղների ներմուծման լրացուցիչ մաքսատուրքերին ավելացնել նաև հարյուրավոր այլ ապրանքներ, որոնք պարունակում են պողպատ և ալյումին, հայտնում է պարբերականը կիրակի՝ սեպտեմբերի 7-ի գիշերը։
Սկզբում ԱՄՆ նախագահ Դոնալդ Թրամփի որոշումը վերաբերում էր միայն պողպատի և ալյումինի հումքին ու դրանցից արտադրված արտադրանքին։ Այժմ այն տարածվել է նաև շարժիչների, պոմպերի, հաստոցների և շինարարական սարքավորումների վրա։ WSJ-ի պարզաբանմամբ՝ այս փոփոխությունների պատճառով եվրոպացի բազմաթիվ արտադրողներ ստիպված են լինելու վճարել մաքսատուրքեր, որոնք գերազանցում են Թրամփի և Եվրահանձնաժողովի նախագահ Ուրսուլա ֆոն դեր Լյայենի միջև համաձայնեցված 15% լրացուցիչ մաքսատուրքերը։
Պարբերականի տվյալներով՝ որոշ եվրոպական ընկերություններ արդեն դադարեցնում են արտահանումը ԱՄՆ և դիտարկում են մատակարարումների ուղղությունը փոխելու հնարավորությունը։ Մասնավորապես, գյուղտեխնիկայի արտադրող Krone ընկերությունը ուսումնասիրում է ապրանքների մատակարարումը Մեքսիկա և Կանադա՝ ԱՄՆ շուկայի փոխարեն։
WSJ-ի փոխանցմամբ՝ եվրոպական բիզնեսի դժգոհության հետևանքով Ուրսուլա ֆոն դեր Լեյենի և Թրամփի միջև ձեռք բերված գործարքը գտնվում է ձախողման եզրին։ Գործարքը քննադատվում է նաև Եվրոպական խորհրդարանում, որի համաձայնությունը անհրաժեշտ է համաձայնագրի հիմնական դրույթների ուժի մեջ մտնելու համար։ Եվրոպական խորհրդարանի առևտրի կոմիտեի նախագահ Բերնդ Լանգեն հայտնել է, որ պատգամավորները կարող են պահանջել փոփոխություններ ԵՄ-ԱՄՆ առևտրային համաձայնագրի նախագծում։
Հուլիսի վերջին Դոնալդ Թրամփն ու ֆոն դեր Լեյենը պայմանավորվեցին առևտրային գործարքի շուրջ, ըստ որի՝ ԱՄՆ-ը ԵՄ ապրանքների վրա պահպանելու էր 15% մաքսատուրքը բոլոր ոլորտներում՝ բացառությամբ պողպատի և ալյումինի մատակարարումների, որոնց համար սահմանվելու էր 50% տուրք։ Սա երկու անգամ պակաս էր Թրամփի նախկինում նշած 30% միջին սակագնից։ Իր հերթին ԵՄ-ն կասեցրեց 93 միլիարդ եվրո արժողությամբ պատասխան միջոցառումները։
Օգոստոսի 7-ին Թրամփը հայտարարեց ԵՄ-ի նկատմամբ լրացուցիչ մաքսատուրքերի ուժի մեջ մտնելու մասին։
