29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Վրաստանում բողոքի ցույցերի մասնակցած ռուս ակտիվիստ Անտոն Չեչինը դատապարտվել է 8,5 տարվա ազատազրկման
Քաղաքականություն
02.09.2025 | 19:35
Թբիլիսիի քաղաքային դատարանը Ռուսաստանի քաղաքացի Անտոն Չեչինին դատապարտել է 8,5 տարի ժամկետով ազատազրկման։ Նա մեղավոր է ճանաչվել առանձնապես խոշոր չափերով թմրանյութեր պահելու մեջ։ Այս մասին հայտնում է Radio Tavisupleba-ն, որին վկայակոչում է Meduza-ն։
Չեչինը չի ընդունել մեղքը։ 2024 թվականի դեկտեմբերին ձերբակալվելուց հետո նա բազմիցս հայտարարել է, որ իր մոտ թմրանյութ են գցել Վրաստանում բողոքի ցույցերին մասնակցելու համար։ Ռուս ակտիվիստի փաստաբան Գիորգի Չխեիձեն պահանջել է մեղադրանքի կողմի ապացույցները ճանաչել կեղծ՝ նշելով, որ դրանք հիմնված են անանուն աղբյուրի տվյալների վրա։
Այն բանից հետո, երբ դատավոր Ջվեբե Նաչկեբիան հրապարակել է դատավճիռը, դատարանում ծեծկռտուք է սկսվել, քանի որ դատական կատարածուները շենքից ուժով դուրս ե մղել Չեչինի կողմնակիցներին, գրում է Paper Kartuli-ն:
Tbilisi life տելեգրամ ալիքի տվյալներով էլ՝ դատական կատարածուները հավաքվածների «գլուխները հարվածել են դռներին և պատերին»։ Մի քանի մարդ վիրավորվել է:
Անտոն Չեչինը Ռուսաստանի քաղաքացի է, ծնվել է 1998 թվականին: Նա մասնակցել է Ռուսաստանում տեղի ունեցած բողոքի ցույցերին: 2024 թվականին Մարդու իրավունքների եվրոպական դատարանը պարտավորեցրել է Ռուսաստանի իշխանություններին նրան վճարել 4000 եվրո փոխհատուցում՝ այն բանից հետո, երբ նա ձերբակալվել է 2021 թվականի ապրիլին ընդդիմադիր գործիչ Ալեքսեյ Նավալնիի աջակցության հանրահավաքի ժամանակ:
Ռուս-ուկրաինական պատերազմի սկսվելուց հետո Չեչինը մեկնել է Վրաստան, որտեղ ամուսնացել է։
Նա մասնակցել է 2023 թվականին Թբիլիսիում տեղի ունեցած բողոքի ցույցերին՝ «օտարերկրյա գործակալների» մասին տեղական օրենքի դեմ։ Չեչինը մասնակցել է նաև ցույցերին, որոնք սկսվել են 2024 թվականի նոյեմբերին, երբ Վրաստանի կառավարությունը կասեցրել էր ԵՄ-ին երկրի անդամակցության բանակցությունները։ Չեչինը ձերբակալվել է այդ բողոքի ցույցերը սկսվելուց կարճ ժամանակ անց։
Վրաստանում չորս ցուցարարների մեղադրանք է առաջադրվել թմրանյութեր պահելու համար, այդ թվում՝ Անաստասիա Զինովկինային (Նաստյա Տոպոր) և նրա ընկեր Արտյոմ Գրիբուլյային։ Նմանատիպ մեղադրանքներ են առաջադրվել նաև ռեանիմատոլոգ Գիորգի Ախոբաձեին և հեռուստահաղորդավար Նիկա Կացիային։
Թարգմանությունը՝ Էմմա Չոբանյանի
