Զախարովան հայտարարել է, թե ՌԴ-ն արտատարածքային ռեժիմ չի առաջարկել Հայաստանով հաղորդակցությունների համար

ՌԴ ԱԳՆ պաշտոնական ներկայացուցիչ Մարիա Զախարովան այսօրվա ճեպազրույցում հայտարարել է, թե Ռուսաստանը չի առաջարկել արտատարածքային ռեժիմ Հայաստանի տարածքով ուղևորների և բեռների տարանցման համար՝  հաղորդակցության ապաշրջափակման համատեքստում։

Նա նշել է, որ Վաշինգտոնի հուշագրում ամրագրված՝ Սյունիքով «Թրամփի երթուղու» իրականացման ընթացքում տարածքային ամբողջականության և սահմանների անձեռնմխելիության սկզբունքի վերաբերյալ դրույթներն այն հիմնարար կետերն են, որոնք համաձայնեցվել են Վաշինգտոնի համաձայնագրերից երկու տարի առաջ՝ Հայաստանի, Ռուսաստանի և Ադրբեջանի փոխվարչապետերի համանախագահությամբ գործող եռակողմ աշխատանքային խմբի շրջանակում։

«Ռուսական կողմը «Թրամփի երթուղու» վերաբերյալ մանրամասներ չունի, սակայն, որքանով հնարավոր է հասկանալ, բեռների և ուղևորների տարանցման, երթևեկության անվտանգության վերաբերյալ մանրամասները դեռևս համաձայնեցված չեն»-,ա սել է ՌԴ ԱԳՆ պաշտոնական ներկայացուցիչը։

Զախարովան նշել է, որ եռակողմ աշխատանքային խմբի շրջանակում հնարավոր է եղել կոնկրետ համաձայնությունների հասնել Սյունիքով երկաթուղային տարանցման, այդ թվում՝ էլեկտրոնային մաքսային հսկողության համակարգերի, նավիգացիոն կնիքների կիրառման վերաբերյալ։ Դրանց կիրառումն այժմ ակտիվորեն փորձարկվում է երկկողմ առևտրում։

Ըստ նրա՝ հաշվի առնելով Ռուսաստանի և Հայաստանի միջև ԵՏՄ ընդհանուր տարածքը՝ արտատարածքային ռեժիմը նույնիսկ տեսականորեն չէր կարող դիտարկվել։ Միևնույն ժամանակ, ռուսական կողմը տեսնում է, թե որքան անվստահելի  տեղեկատվություն է շրջանառվում այս թեմայի շուրջ, որը նպատակ ունի վարկաբեկել ՌԴ-ի հետ եռակողմ ձևաչափը և իրականություն հետ աղերս չունի, հավելել է ռուսաստանցի պաշտոնյան։

Թարգմանությունը՝ Էմմա Չոբանյանի