Զելենսկին հայտարարել է, որ ՌԴ-ն խուսափում է պատերազմի ավարտի վերաբերյալ բանակցություններից

Մոսկվան «փորձում է խուսափել Ռուսաստանի և Ուկրաինայի ղեկավարների միջև հանդիպման անհրաժեշտությունից», հայտարարել է Ուկրաինայի նախագահ Վլադիմիր Զելենսկին։  Նա նշել է, որ Ռուսաստանի զինված ուժերն Ուկրաինայում «նպատակային հարված են հասցրել հատկապես ամերիկյան սեփականությանը» այն ժամանակ, երբ աշխարհը ռուսներից սպասում է «պատերազմը դադարեցնելու բանակցությունների վերաբերյալ պատասխանի», փոխանցում է DW-ի ռուսական ծառայությունը։

«Կա երկու ձևաչափ, որոնցում իսկապես կարելի է առաջընթացի հասնել։ Դրանք առաջնորդների մակարդակով, երկկողմ ձևաչափն է Ուկրաինա և Ռուսաստան, ինչպես նաև եռակողմ ձևաչափը՝ Ուկրաինա, ԱՄՆ, Ռուսաստան։ Մենք սա քննարկել ենք Վաշինգտոնում։ Պուտինը խոսել է այս մասին նախագահ Թրամփի հետ հեռախոսազրույցի ժամանակ։ Նրանք փորձում են խուսափել հանդիպում անցկացնելու անհրաժեշտությունից։ Նրանք չեն ցանկանում ավարտել այս պատերազմը»,- հավելել է Զելենսկին։

Նա հիշատակել է օգոստոսի լույս 20-ի գիշերը Լեհաստանում անօդաչու թռչող սարքի խոցումը և հիշեցրել, թե ինչպես է Լիտվան նախկինում բախվել «անօդաչու թռչող սարքերի հետ կապված տհաճ միջադեպերի»։ Այս առումով նա Կիևի գործընկերների կողմից «սկզբունքային» արձագանքի հույս է հայտնել։

«Այս պատերազմը պետք է ավարտվի։ Մենք պետք է ճնշում գործադրենք Ռուսաստանի վրա, որպեսզի պատերազմն ավարտվի։ Պուտինը ոչինչ չի հասկանում՝ բացի ուժից և ճնշումից։ Իհարկե, մենք անում ենք և անելու ենք ամեն ինչ, որն անհրաժեշտ է մեր պետությունը և մեր ժողովրդին պաշտպանելու համար։ ԱՄՆ նախագահը բացարձակապես ճիշտ է՝ սա պետք է արվի ոչ միայն պաշտպանության համար»,- ասել է Ուկրաինայի նախագահը։

ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Կայա Կալլասը նույնպես կարծիք է հայտնել, որ ՌԴ նախագահ Վլադիմիր Պուտինը «հետաքրքրված չէ բանակցություններով», այլ միայն փորձում է ժամանակ շահել։

Նրա խոսքով՝ Միացյալ Նահանգները, Եվրոպան և Ուկրաինան խաղաղություն են ուզում։

«Բայց մենք տեսնում ենք, որ ռուսական կողմը միայն խաղեր է խաղում և խոչընդոտներ է ստեղծում»,- հավելել է նա։