Քաղաքականություն
05.10.2026 | 20:25
2026 թվականի սկզբից մինչև հոկտեմբերի 4-ն Ադրբեջանում ոչ մարտական իրավիճակներում զոհվել է առնվազն 44 զինծառայող։ Այս մասին ասվում է Կասպիական ռազմական հետազոտությունների ինստիտուտի վերջին զեկույցում, գրում են ադրբեջանական լրատվամիջոցները։
Տեղեկատվության համաձայն՝ զինծառայողներից 13-ը մահացել են տարբեր հիվանդություններից, 9-ը՝ ավտովթարներից, 7-ը՝ դժբախտ պատահարներից, 5-ը՝ ինքնասպանությունից, իսկ 1-ը՝ անզգուշությունից։ Զեկույցում նշվում է, որ 9 մարդու մահվան պատճառը չի բացահայտվել։
Մոնիթորինգի տվյալների համաձայն՝ հուլիսը մահացությունների ամենաբարձր ցուցանիշն ունեցող ամիսն էր․ այդ ամիս մահացել է 11 զինծառայող։ Մահացածներից 30-ը Պաշտպանության նախարարության զինծառայողներ էին, 10-ը՝ Պետական սահմանապահ ծառայության, իսկ ևս 4-ը՝ Ներքին զորքերի, Նախագահական անվտանգության ծառայության, Արտակարգ իրավիճակների նախարարության և Զորակոչի պետական ծառայության զինծառայողներ։
Նշվում է, որ նույն ժամանակահատվածում վիրավորվել է առնվազն 8 զինծառայող։ Նրանցից 5-ը վիրավորվել են ավտովթարի հետևանքով, 2-ը՝ ականի վրա պայթելու, իսկ 1-ը՝ լեռներում տեղի ունեցած սողանքի հետևանքով։
Մահացածներից 11-ը զինվորներ են, 6-ը՝ արտաժամկետ ծառայության մեջ գտնվողներ, 8-ը՝ ենթասպաներ, 5-ը՝ սպաներ, 4-ը՝ կուրսանտներ, իսկ 1-ը՝ սերժանտ։ Ինստիտուտը հայտնում է, որ մյուս 9 անձանց զինվորական կոչումը որոշել հնարավոր չէ։
Ինստիտուտի տվյալներով՝ 2025 թվականին Ադրբեջանի անվտանգության և պաշտպանության ոլորտում ոչ մարտական իրավիճակներում մահացել է առնվազն 43 զինծառայող։
Թարգմանությունը՝ Էմմա Չոբանյանի
