Զելենսկին և Պուտինը պայմանավորվում են հանդիպման վերաբերյալ․ Թրամփ

Ուկրաինայի և Ռուսաստանի նախագահներ Վլադիմիր Զելենսկին և Վլադիմիր Պուտինը երկկողմ հանդիպում կազմակերպելու գործընթացում են՝ պատերազմի ավարտը քննարկելու համար։ Այս մասին հայտարարել է ԱՄՆ նախագահ Դոնալդ Թրամփը, փոխանցում է DW-ի ռուսական ծառայությունը:

«Ես շատ հաջող հանդիպում ունեցա նախագահ Պուտինի հետ: Շատ հաջող հանդիպում ունեցա նախագահ Զելենսկիի հետ, և հիմա կարծում եմ, որ ավելի լավ կլինի, եթե նրանք հանդիպեն առանց ինձ, որպեսզի տեսնենք, թե ինչ կլինի»,- ասել է ԱՄՆ նախագահը «The Mark Levin Show»-ի եթերում:

Ավելի վաղ Թրամփի մամուլի քարտուղար Քերոլայն Լիվիթը հաստատել էր Զելենսկիի հետ անձնական հանդիպման՝ Պուտինի պատրաստակամությունը: Նրա խոսքով՝ Ռուսաստանի և Ուկրաինայի նախագահների հանդիպման ծրագիրն այժմ «մշակման փուլում է», քննարկվում են «շատ տարբերակներ»:

«Երկու առաջնորդներն էլ պատրաստակամություն են հայտնել նստել [բանակցային սեղանի շուրջ], ուստի մեր ազգային անվտանգության թիմը կօգնի երկու երկրներին  դա անել»,- Սպիտակ տանը կայացած ճեպազրույցի ժամանակ ասել է Լիվիթը։

Օգոստոսի 18-ին Վաշինգտոնում Ուկրաինայի նախագահի ու եվրոպացի քաղաքական գործիչների հետ բանակցություններից հետո Դոնալդ Թրամփն իր Truth Social սոցիալական ցանցում հայտնել էր Պուտինի և Զելենսկիի հանդիպման նախապատրաստման մասին։

«Դեմ առ դեմ հանդիպումից հետո տեղի կունենան եռակողմ բանակցություններ, որոնց կմասնակցեն երկու նախագահնեը և ես»,- գրել էր Սպիտակ տան ղեկավարը։

Մինչ այդ, ՌԴ ԱԳ գործերի նախարար Սերգեյ Լավրովը չի հաստատել Պուտինի և Զելենսկու միջև ուղիղ բանակցությունների նախապատրաստումը։ Նա ընդգծել է, որ Մոսկվան չի հրաժարվում պատերազմի կարգավորմանն ուղղված աշխատանքի որևէ ձևաչափից։ Սակայն, ըստ Լավրովի, ամենաբարձր մակարդակով շփումները պետք է նախապատրաստվեն «հնարավորինս ուշադիր»։