24.06.2026 | 16:06
Առաջիկա օրերին սպասվում է անձրև, ամպրոպ, քամու ուժգնացում
Էդ ծուխը բոլորիս տուն ա լցվում․ Նուբարաշենի աղբավայրը ծխում է արդեն չորս օր
Հասարակություն
11.08.2025 | 20:30
Արդեն չորրրորդ օրն է` Երևանի կենտրոնից ընդամենը մի քանի կիլոմետր հեռավորության վրա գտնվող Հայաստանի ամենամեծ աղբավայրում բռնկված հրդեհի թանձր ծուխը չի ցրվում։ Նուբարաշեն և Էրեբունի վարչական շրջանների բնակիչներն առաջինն են զգացել դրա հետևանքները։
Աղբավայրում հրդեհ էր բռնկվել օգոստոսի 8-ի ուշ երեկոյան։ Քաղաքի տարբեր հատվածներից տեսանելի էին կրակն ու ծխի ամպերը։
Երևանի քաղաքապետի խորհրդական Կամո Արեյանի խոսքով՝ քաղաքապետարանն իր վրա է վերցրել մարման աշխատանքների կազմակերպումը․ մոբիլիզացվել է քաղաքային ռեսուրսը, ներգրավված է ողջ ԵԱՍՄ հիմնարկը, հողալցման աշխատանքներին աջակցում են նաև մասնավոր կազմակերպությունները։
Հրդեհի մակերեսը մոտ հինգ հեկտար է կազմում՝ նշում է ՆԳՆ փրկարար ծառայության Երևանի փրկարարական վարչության պետի տեղակալ Ահարոն Ղազարյանը։
Քաղաքապետի խորհրդականի դիտարկմամբ՝ շուրջ 75 տարի գործող այս աղբավայրի խնդիրը լուծման կարիք ունի։ Ըստ Արեյանի՝ ճանապարհը մեկն է՝ պետություն, համայնք, մասնավոր համագործակցությամբ աղբի վերամշակման գործարանի ստեղծում։ Նախկինում չի ստացվել, սակայն հիմա, նրա խոսքով, քաղաքապետ Տիգրան Ավինյանը վճռական է տրամադրված։
Համայնքային իշխանությունը բազմիցս խոստացել էր կոնսերվացնել աղբավայրը, դրա փոխարեն 2024-ին սկսել ժամանակակից ստանդարտներով աղբավայրի կառուցումը։ Սակայն աղբի վերամշակման գործարան կառուցելու մրցույթը հայտարարվել է ընդամենը վեց ամիս առաջ։ Կառույցից տեղեկացնում են՝ դեռ արդյունքներ հրապարակել չեն կարող, սպասում են կազմակերպությունների, որոնք պատրաստ կլինեն իրականացնել այդ ներդրումային ծրագիրը մայրաքաղաքում։
Մանրամասները՝ տեսանյութում։
Անի Թամրազյան
