07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Բաքուն ոչնչացրել է Ստեփանակերտի Հովհաննես Այվազովսկու հուշարձանը
31.07.2025 | 18:51
Բաքուն ոչնչացրել է Արցախի մայրաքաղաք Ստեփանակերտում տեղադրված հայ մեծանուն նկարիչ Հովհաննես Այվազովսկու հուշարձանը։ Այս մասին հայտնում է Արցախի Զբոսաշրջության եւ մշակույթի զարգացման գործակալությունը։
«Այսօր հռչակավոր ծովանկարիչ Հովհաննես (Իվան) Այվազովսկու ծննդյան օրն է։ Այս օրը ցավով արձանագրում ենք, որ 2021 թվականին Ստեփանակերտում տեղադրված Այվազովսկու հուշարձանը ոչնչացվել է ադրբեջանական օկուպացիոն վարչակազմի կողմից, այն բանից հետո, երբ 2023 թվականին Արցախի ողջ բնակչությունը բռնությամբ տեղահանվեց հայրենիքից»,- ասվում է հայտարարության մեջ։
Նշվում է, որ հուշարձանի հեղինակը ռուսաստանցի քանդակագործ Սալավատ Շչերբակովը։ Այն նվիրված էր ոչ միայն համաշխարհային ճանաչում ունեցող հայ նկարչին, այլև Արցախը հայկական և համազգային մշակութային ժառանգությանը միացնող կապերին։
«Հուշարձանի ոչնչացումը հանդիսանում է Արցախում հայկական մշակութային ներկայության համակարգված վերացման հերթական վկայությունը։ Մենք շարունակում ենք փաստել, արձանագրել և հանրայնացնել մշակութային արժեքների ոչնչացման փաստերը՝ համոզված լինելով, որ դրանք չեն մոռացվելու, և միջազգային հանրությունը կձեւակերպի արժանի գնահատական։ Մենք հիշում ենք։ Մենք արձանագրել ենք։ Մենք վերադառնալու ենք»,- ընդգծվում է հայտարարության մեջ։
Պաշտոնական Բաքուն չի մեկնաբանել հուշարձանի ոչնչացումը։ Ադրբեջանական իշխանամերձ լրատվամիջոցներն էլ գրում են, թե հուշարձանը, իբր, Արցախում հայտնվել է ոչ թե Ադրբեջանի համաձայնությամբ, այլ ռուս խաղաղապահների ջանքերով, որոնք այլևս այնտեղ չեն, հուշարձանը՝ նույնպես։
Ռուսաստանի ժողովրդական նկարիչ, հուշարձանի հեղինակ Սալավատ Շչերբակովը հայտարարել է, որ Հովհաննես Այվազովսկու հուշարձանի ապամոնտաժումը վանդալիզմի ակտ է։ Քանդակագործի խոսքով՝ Այվազովսկին ինչպես ռուսական, այնպես էլ հայկական գեղանկարչության ականավոր վարպետ է։ Նա խոսել է նաև ապամոնտաժված հուշարձանը հանձնելու մասին՝ նշելով շահագրգիռ կողմերի միջև բանակցությունների անհրաժեշտությունը։
Թարգմանությունը՝ Էմմա Չոբանյանի
