09.12.2025 | 23:31
Եվրոպական հանձնաժողովը հետաքննություն է սկսել Google-ի դեմ
Գերմանիայի դատարանը Բունդեսթագի նախկին պատգամավորին մեղավոր է ճանաչել Բաքվից գումարների ստացման գործով
Քաղաքականություն
30.07.2025 | 15:13
Մյունխենի Բարձրագույն շրջանային դատարանը «Ադրբեջանի գործով» Բունդեսթագի Քրիստոնեա-սոցիալիստական միության նախկին պատգամավոր Էդուարդ Լինտներին մեղավոր է ճանաչել ընտրված պաշտոնյաներին կաշառելու մեջ, գրում գերմանական ZDF-ը։
Նրա ինը ամիս ժամկետով ազատազրկման դատավճիռը պայմանականորեն է կիրառվել։ Դատավարությունը տևել է վեց ամիս։
Մյունխենի դատախազությունը Լինտներին մեղադրել էր ադրբեջանական միջոցներով այլ ընտրված պաշտոնյաներին կաշառելու մեջ։ Նշվում է, որ նա մտադրություն է ունեցել Եվրոպայի խորհրդի Խորհրդարանական վեհաժողովում (ԵԽԽՎ) ադրբեջանամետ քվեարկություն ապահովել։
2008-ից 2016 թվականներին Լինտները մի քանի կեղծ ընկերությունների միջոցով Ադրբեջանից ստացել է մոտ չորս միլիոն եվրո։ Նախկին խորհրդարանական պետքարտուղարը 33 տարի ծառայել է Բունդեսթագում և մինչև 2010 թվականը եղել է ԵԽԽՎ անդամ։
Կաշառակերության մեղադրանքների կենտրոնում էր նաև Կարին Շտրենցը՝ Բունդեսթագի Քրիստոնեա-դեմոկրատական միության անդամ։ Նա նաև ԵԽԽՎ անդամ էր և համարվում էր Ադրբեջանի նվիրված կողմնակից։ Ասում են, որ նա, ի թիվս այլնի, քվեարկել է երկրում քաղբանտարկյալների վերաբերյալ զեկույցի դեմ։ 2021 թվականին Կարին Շտրենցը մահացել է Կուբայից Գերմանիա թռչող ինքնաթիռում:
Լրատվամիջոցը գրում է, որ Ադրբեջանում ավտորիտար կառավարում է նախագահ Իլհամ Ալիևը։ Հատկապես խնդրահարույց է համարվում երկրի վերաբերմունքը ռեժիմի քննադատների նկատմամբ։ 2001 թվականի հունվարին Ադրբեջանը միացել է Եվրոպայի խորհրդին, որը նվիրված է մարդու իրավունքներին, ժողովրդավարությանը և օրենքի գերակայությանը։ Այդ ժամանակից ի վեր երկիրը փորձում է ազդել այնտեղ քվեարկության արդյունքների վրա իր օգտին։
Հիշեցնենք, որ Լինտներն ավելի վաղ դատավարության ժամանակ խոստովանել էր, որ Բաքվից գումարներ է ստացել։
Թարգմանությունը՝ Էմմա Չոբանյանի
