Պեսկովը հույս է հայտնել, որ Ուկրաինայի շուրջ տարաձայնությունները չեն խանգարի Մոսկվայի և Բաքվի հարաբերություններին

Ուկրաինական հակամարտության շուրջ տարաձայնությունները չպետք է խաթարեն Ռուսաստանի և Ադրբեջանի միջև փոխշահավետ հարաբերությունները։ Այս մասին ճեպազրույցի ժամանակ հայտարարել է Ռուսաստանի նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։

«Մեզ հայտնի է Ադրբեջանի ղեկավարության դիրքորոշումն Ուկրաինայի հարցում։ Այստեղ մենք տարբեր կարծիքներ ունենք։ (Ադրբեջանի) նախագահ Իլհամ Ալիևը հենց սկզբից նման դիրքորոշում է ունեցել։ Հենց սկզբից մենք չենք համաձայնել դրա հետ»,-ասել է Կրեմլի մամուլի խոսնակը՝ հավելելով․ «Միևնույն ժամանակ, մենք հույս ունենք, որ այս տարաձայնությունները  մեզ համար խոչընդոտ չեն լինի երկկողմ հարաբերություններում կարճատև սառեցման շրջանի միջով անցնելու համար և չեն զոհաբերի փոխադարձ փոխշահավետ շահերը հօգուտ այսրոպեական  իրավիճակի»։

Հիշեցնենք, որ հայաթափված Ստեփանակերտում անցկացված Շուշիի Գլոբալ մեդիաֆորումի ժամանակ Ադրբեջանի նախագահ Իլհամ Ալիևը հայտարարել էր, որ Բաքուն միջազգային հայց է պատրաստում Ռուսաստանի դեմ՝ 2024 թվականի վերջին «Ադրբեջանական ավիաուղիների» (AZAL) օդանավի կործանման պատճառով:

Ալիևը կոչ էր արել Ուկրաինային «չհամաձայնել օկուպացիային»։

«Երբեք չհամաձայնվել օկուպացիայի հետ, սա է գլխավոր խորհուրդը»,- ասել էր Ադրբեջանի նախագահը Շուշիի 3-րդ գլոբալ մեդիաֆորումի ընթացքում ուկրաինացի լրագրող Դմիտրի Գորդոնի հարցին ի պատասխան։

Բացի այդ՝ ֆորումի ժամանակ ուկրաինացի լրագրող Ելենա Կուրբանովան Ալիևին նվիրել էր Ուկրաինայի զինված ուժերի շևրոններ: Ադրբեջանի ղեկավարը նվերն ընդունելուց հետո ասել էր. «Շարունակեք այդպես»:

Թարգմանությունը՝ Էմմա Չոբանյանի