Կրեմլը արձագանքել է Ալիևի՝ ՌԴ-ի դեմ միջազգային ատյաններ դատական ​​հայցեր ներկայացնելու ծրագրերին

Ռուսաստանի նախագահի մամուլի քարտուղար Դմիտրի Պեսկովը, մեկնաբանելով Ադրբեջանի նախագահ Իլհամ Ալիևի խոսքերը AZAL ավիաընկերության օդանավի վթարի կապակցությամբ միջազգային դատարաններում հայցեր ներկայացնելու ծրագրերի մասին, ասել է, թե Բաքվի իրավունքն է նման որոշում կայացնելը, փոխանցում է ՌԻԱ Նովոստին։

«Եթե Ադրբեջանը նման որոշում կայացնի, դա Ադրբեջանի իրավունքն է, մենք կսպասենք բոլոր հետաքննությունների և դատավարությունների պաշտոնական որոշումներին»,- լրագրողներին ասել է Պեսկովը՝ պատասխանելով Մոսկվայի արձագանքի մասին հարցին։

Բացի այդ, նա նշել է, որ Ռուսաստանի համար կարևոր է, որ ռուսներին հարգեն Ադրբեջանում։

«Երկու երկրների շահերի համընկնում կա, կա փոխշահավետ համագործակցություն՝ հիմնված փոխադարձ հարգանքի վրա, բայց երբեմն պատահում է, որ երկու երկրների հարաբերություններում դժվար շրջաններ են լինում։ Հիմա այդպիսի շրջաններից մեկն է։ Հուսով ենք, որ այն կանցնի: Մեզ համար շատ կարևոր է, որ ռուսներին հարգեն Ադրբեջանում»,- հայտարարել է Կրեմլի խոսնակը։

Նրա այս մեկնաբանությունները հնչում են Եկատերինբուրգում ադրբեջանցիների ձերբակալություններից հետո Մոսկվայի և Բաքվի միջև հարաբերությունների կտրուկ վատթարացման ֆոնին։

«Ադրբեջանական սփյուռքի գրեթե բոլոր ներկայացուցիչները մեր օրինապահ քաղաքացիներն են, ովքեր այստեղ վայելում են արժանի հարգանք։ Օրենքները խախտող քաղաքացիները հետապնդվում են օրենքով»,- հավելել է Պեսկովը։

Հիշեցնենք՝ Իլհամ Ալիևը հայտարարել էր, որ Ադրբեջանը միջազգային հայց է պատրաստում Ռուսաստանի դեմ՝ 2024 թվականի վերջին «Ադրբեջանական ավիաուղիների»՝ AZAL–ի օդանավի կործանման պատճառով:

2024 թվականի դեկտեմբերի 25-ին Ղազախստանի Ակտաու քաղաքի մոտակայքում վթարի էր ենթարկվել AZAL-ի J2-8243 չվերթը կատարող Embraer 190AR ուղևորատար օդանավը։ Դրանում եղել էր 67 մարդ՝ 62 ուղևոր և անձնակազմի 5 անդամ։ Վթարի հետևանքով զոհվել էր 38 մարդ, 29-ը՝ ողջ մնացել։

Վերջերս էլ ադրբեջանական լրատվամիջոցները հրապարակել էին ռուս կապիտան Դմիտրի Պալադիչուկի բացատրական գրությունը, որը նկարագրել է, թե ինչպես է 2024 թվականի դեկտեմբերին Գրոզնիում անօդաչու թռչող սարքերի հարձակման ժամանակ ստացել ադրբեջանական AZAL-ի օդանավի վրա կրակ բացելու հրաման և, իր հերթին, այդ հրամանը փոխանցել օպերատորին։

Ադրբեջանի և Ռուսաստանի հարաբերությունները կրկին սրվել են այն բանից հետո, երբ հունիսի 27-ին Եկատերինբուրգում ձերբակալվել էր  ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։

Թարգմանությունը՝ Էմմա Չոբանյանի