08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Մոսկվայում ջրհեղեղ է. հեղեղվել են փողոցները, մետրոն, անգամ Պետդուման․ ՏԵՍԱՆՅՈՒԹ
Քաղաքականություն
15.07.2025 | 17:41
Մոսկվայում, Մոսկվայի մարզի և հարակից շրջաններում տեղատարափ անձրևներ են՝ ամպրոպի ուղեկցությամբ, գրում է Lenta-ն։ Հիդրոօդերևութաբանության կենտրոնը հայտնել է նաև կարկուտի ու մինչև 20 մետր վայրկյան արագությամբ քամու մասին։ Միևնույն ժամանակ, փոթորիկն ուղեկցվում է շոգով՝ +28-30 աստիճան ջերմաստիճանով։
Հաղորդվում է, որ քաղաքի մի շարք շրջաններում երկու ժամվա ընթացքում մեկ ամսվա տեղումներ են գրանցվել։ Հորդառատ անձրևները և ուժեղ քամին կշարունակվեն առնվազն մինչև կեսգիշեր։ «Ֆոբոս» կենտրոնի առաջատար մասնագետ Եվգենի Տիշկովեցի կանխատեսման համաձայն՝ անձրևները ՌԴ մայրաքաղաքի շրջանում կշարունակվեն մինչև ուրբաթ՝ հուլիսի 18-ը։
Մոսկվայի բնակիչները բազմաթիվ լուսանկարներում և տեսանյութերում արձանագրել են հեղեղի հետևանքները։ Քաղաքի բազմաթիվ փողոցներ, ստորգետնյա անցումներ և մետրոյի կայարանները հեղեղվել են։ Տրանսպորտի դեպարտամենտը զգուշացրել է ցամաքային տրանսպորտի ուշացումների մասին՝ եղանակային պայմանների և որոշ երթուղիների շահագործման փոփոխությունների պատճառով։
Դմիտրովսկոյե մայրուղում՝ մետրոյի Վերին Լիխոբորի կայարանի մոտ, երթևեկությունը լիովին արգելափակվել է, գնացքները դադարեցրել են երթևեկությունը դեպի «Շերեմետևո» օդանավակայան։ Ավելի ուշ, սակայն, երթևեկությունը վերականգնվել է։
Տեսանյութներից մեկում էլ ֆիքսվել է, թե ինչպես է կայծակը հարվածում Օստանկինո հեռուստաաշտարակի հարևանությամբ գտնվող տանը։ Նախնական տվյալներով՝ հետևանքներ չեն եղել։ Ի թիվս այլ բաների, հեղեղները չեն շրջանցել նաև Պետդումայի շենքը․ հեղեղվել է ծխողների համար նախատեսված սրահը։
Հիդրոօդերևութաբանության կենտրոնը վտանգի «նարնջագույն» մակարդակ է հայտարարել ՌԴ մայրաքաղաքում և Մոսկվայի մարզում մինչև հուլիսի 16-ը։
Թարգմանությունը՝ Էմմա Չոբանյանի
