07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ԿԺԴՀ-ն Ռուսաստանին է փոխանցել 12 միլիոն հրետանային ռումբ․ Հարավային Կորեայի հետախուզություն
Քաղաքականություն
13.07.2025 | 13:41
Հյուսիսային Կորեան շարունակում է մատակարարել Մոսկվային հրետանային ռումբեր։ Հարավային Կորեայի ռազմական հետախուզության վարչության (DIA) զեկույցի համաձայն՝ Ռուսաստանի Ուկրաինայի դեմ պատերազմի ընթացքում Փհենյանը կարող էր Ռուսաստանին փոխանցել ընդհանուր առմամբ մոտ 12 միլիոն 152 մմ տրամաչափի հրետանային ռումբ։ Այս մասին գրում է Yonhap գործակալությունը, հղում անելով հարավկորեական հետախուզության տվյալներին։
Հետախուզության տվյալներով՝ մինչ այժմ Հյուսիսային Կորեան Ռուսաստանի է ուղարկել շուրջ 28 հազար բեռնարկղ, որոնք պարունակել են զենք և հրետանային ռումբեր։
«Եթե հաշվում ենք 152 մմ տրամաչափի ռումբերով, ապա դրանց ընդհանուր քանակը հավանաբար գերազանցել է 12 միլիոնը»,-նշվում է հաղորդագրության մեջ։
Ավելի վաղ The Washington Post թերթը հաղորդել էր, որ 2023 թ․ օգոստոսից մինչև 2024 թ․ հունվար Հյուսիսային Կորեան կարող էր Ռուսաստանին ուղարկել մոտ 1,6 միլիոն հրետանային ռումբ։ Ուկրաինայի ռազմական հետախուզության ղեկավար Կիրիլ Բուդանովը նշել է, որ ներկայումս ռուսական խոշոր տրամաչափի զինամթերքի մինչև կեսը հյուսիսկորեական ծագում ունի։
Ռուսաստանը երբեք պաշտոնապես չի հաստատել ԿԺԴՀ-ից զինամթերքի գնման փաստը, սակայն պատերազմի սկզբին ռուսական բանակում նկատվող «զինամթերքի սակավության» մասին բողոքները դադարել են։
2024 թվականին Ռուսաստանը և Հյուսիսային Կորեան ստորագրել են գործընկերության պայմանագիր, որը ներառում է նաև փոխադարձ ռազմական օգնության դրույթ։ ԿԺԴՀ զինծառայողներ արդեն մասնակցել են ռազմական գործողությունների Կուրսկի շրջանում։ Հարավային Կորեայի և Ուկրաինայի հետախուզության տվյալներով՝ Փհենյանը առաջիկա ամիսներին պլանավորում է Ռուսաստանի հարձակմանն աջակցելու նպատակով Ուկրաինա ուղարկել ևս 25-ից 30 հազար զինծառայող։
