Բաքվում Արցախի ղեկավարների շինծու գործերով նիստում «տուժողներ» են ցուցմունքներ տալիս

Բաքվի զինվորական դատարանում ընթանում է Արցախի ղեկավարների ու տարբեր պաշտոնյաների նկատմամբ հարուցված  շինծու գործերով հերթական նիստը։ Ադրբեջանական լրատվամիջոցների հաղորդմամբ՝ դարձյալ, այսպես կոչված, «տուժողներ» են ցուցմունքներ տալիս։

«Տուժող» Մեհրիբան Բեքիրովան, մասնավորապես, պատմել է, թե, իբր, «Խոջալուի ցեղասպանության ժամանակ՝ 1992 թվականի փետրվարի 25-ի լույս 26-ի գիշերը, իրեն պատանդ են վերցրել հայկական զինված ուժերը, տարել Ստեփանակերտ և պահել 10 օր»։ Այդ ժամանակ նա ունեցել է 4 փոքր երեխա։

Բեքիրովան ասել է, թե իր մեկուկես տարեկան որդին գլխի շրջանում ստացել է բեկորային վերք, իսկ ինքը, իբր, «գերության մեջ խոշտանգումների է ենթարկվել, պահանջել են, որ նա տեղեկություններ տրամադրի իր ամուսնու՝ Աբդուլլա Գամզաևի մասին», որն աշխատել է որպես ոստիկան Իվանյանի օդանավակայանում։

Պատասխանելով դատախազի հարցին՝ Բեքիրովան ասել է, թե, այսպես կոչված, «ցեղասպանությունից առաջ էլ Խոջալուն պարբերաբար հրետակոծվել է, թաքնվել են նկուղում, որտեղ էլ փետրվարի 23-ին ինքը երեխա է ունեցել»։

Մեկ այլ «տուժող» Էվեզ Աբբասովն էլ հայտնել է, որ Կրկժանի բնակիչ է և 1989 թվականին, իբր, հայերը նռնակ են նետել իր և իր եղբոր վրա։

«Ես երրորդ դասարանում էի սովորում, եղբայրս՝ առաջինում։ Մեզ մոտեցան մի խումբ մարդիկ և ասացին, որ մենք վրեժ կլուծենք ադրբեջանցիներից։ Երբ ես փորձեցի օգնություն կանչել, նրանք նռնակ նետեցին մեզ վրա։ Եղբայրս մահացավ, իսկ ես ծանր վիրավորվեցի։ Ես բուժվել եմ Շուշի, Աղդամ և Բաքու քաղաքների հիվանդանոցներում»,- ասել է նա։

Դատական նիստը շարունակվում է։

Հիշեցնենք, որ  նախօրեին տեղի ունեցած նիստում նույնպես, այսպես կոչված, «տուժողներ» էին ցուցմունք տվել։

Թարգմանությունը՝ Էմմա Չոբանյանի