Ցանկացած մեկը, ով ձեռք կբարձրացնի ժողովրդի վրա, այն կկոտրվի․ Վահագն Ալեքսանյան. ՏԵՍԱՆՅՈՒԹ

«Աշխարհում տեռորիստներն ասոցացվում են վախկոտության, ճղճիմության, մարդկային ամենացածր արժեքների և, առհասարակ, անսկզբունքայնության հետ, որովհետև թույլ, ստոր, վախկոտ, նենգ, ողորմելի մարդը կարող է գնալ և տեռորիզմ իրականացնել: Վառ օրինակն այս դահլիճում, այս շենքում իրականացված «հերոսներն են», որոնք, ի դեպ, սերում են Դաշնակցությունից»,- այս մասին ԱԺ-ում «Հայաստան» խմբակցության պատգամավոր Արթուր Սարգսյանի նկատմամբ հանրային քրեական հետապնդում հարուցելու՝ ՀՀ գլխավոր դատախազի միջնորդագրի քննարկման ժամանակ ասաց «Քաղաքացիական պայմանագիր» խմբակցության պատգամավոր Վահագն Ալեքսանյանը:

Ելույթի վերջում իշխանական պատգամավորը հայտարարեց, որ ամեն հանցագործի հասնելու է արդարադատությունը։

«Ցանկացած մեկը, ով ձեռք կբարձրացնի ՀՀ ժողովրդի վրա, նրա ձեռքը կկոտրվի: Ցանկացած մեկը, ով հայ ազգին կանվանի «անասուն», նրա լեզուն կչորանա: Ցանկացած մեկը, ով հետևորդներին կասի «էշ», այստեղ արդեն թող հետևորդները մտածեն»,- հայտարարեց նա։

Նշենք, որ ԱԺ-ն քննարկում է «Հայաստան» խմբակցության պատգամավոր Արթուր Սարգսյանին անձեռնմխելիությունից զրկելու և կալանավորելու՝ գլխավոր դատախազ Աննա Վարդապետյանի միջնորդագիրը։

Ավելի վաղ նիստում ելույթ ունեցավ Արթուր Սարգսյանը։ Նա հայտարարեց, որ ամեն ինչ որոշված է իրեն անձեռնմխելիությունից զրկելու և կալանավորելու հարցում։

Ընդդիմադիր պատգամավորը հավելեց՝ պատրաստվում է 4 անչափահաս երեխաների, կնոջ հետ գնալ եկեղեցի, մոմ վառել և ինքնակամ ներկայանալ Քննչական կոմիտե։

Մանրամասները՝ տեսանյութում։

Մանյա Պողոսյան