Մոսկվայում Ադրբեջանի դեսպանին նոտա է փոխանցվել՝ ռուս լրագրողներին անհապաղ ազատ արձակելու պահանջով

Մոսկվայում Ադրբեջանի դեսպան Ռահման Մուստաֆաևին բանավոր նոտա է փոխանցվել՝ Բաքվում ձերբակալված ռուս լրագրողներին անհապաղ ազատ արձակելու պահանջով։ Այս մասին ասվում է Ռուսաստանի արտաքին գործերի նախարարության հայտարարության մեջ, փոխանցում է ՏԱՍՍ-ը։

«Հուլիսի 1-ին Ռուսաստանի Դաշնությունում Ադրբեջանի արտակարգ և լիազոր դեսպան Ռահման Մուստաֆաևը կանչվել է Ռուսաստանի արտաքին գործերի նախարարություն: Արտաքին գործերի փոխնախարար Միխայիլ Գալուզինի հետ հանդիպման ժամանակ դեսպանին բողոք է ներկայացվել Բաքվի վերջին ոչ բարեկամական գործողությունների, ադրբեջանական կողմի կողմից երկկողմ հարաբերությունները խաթարելու միտումնավոր քայլերի կապակցությամբ»,- հայտնել են նախարարությունից:

Նշվում է, որ «Ադրբեջանի դիվանագիտական ​​առաքելության ղեկավարին բանավոր նոտա է փոխանցվել, որով պահանջվում է անհապաղ ազատ արձակել Բաքվում ձերբակալված ռուս լրագրողներ Իգոր Կարտավիին և Եվգենի Բելոուսովին»։

Ըստ ՌԴ ԱԳՆ-ի՝ Ռուսաստանի իրավապահ մարմիններին իրենց լիազորությունները գերազանցելու մեջ մեղադրելու՝ Բաքվի փորձերը համարվում են ՌԴ ներքին գործերին միջամտություն։ Ընդգծվում է, որ ՌԴ Քննչական կոմիտեն մանրամասն տեղեկատվություն է տրամադրել այդ ամենի վերաբերյալ։

Հիշեցնենք, որ Ադրբեջանի Ներքին գործերի նախարարության կողմից նախօրեին «Россия сегодня» լրատվական գործակալության («Sputnik Ադրբեջան») Բաքվի մասնաճյուղում անցկացված օպերատիվ-հետախուզական միջոցառումների արդյունքում ձերբակալվել է 7 անձ։ Ադրբեջանական լրատվամիջոցների հաղորդմամբ՝ հարուցվել է քրեական գործ՝ խարդախության, անօրինական ձեռնարկատիրության և հանցավոր ճանապարհով ձեռք բերված գույքի օրինականացման հոդվածներով։ Կալանավորվել  է 2 անձ, ևս 5-ը՝ ենթարկվել քրեական պատասխանատվության։

Ավելի վաղ ՌԴ ԱԳՆ-ն հայտնել էր, որ Մոսկվայում Ադրբեջանի դեսպան Ռահման Մուստաֆաևը կանչվել է նախարարություն՝ «Բաքվի ոչ բարեկամական գործողությունների և ռուսաստանցի լրագրողների անօրինական ձերբակալման հետ կապված»։

Թարգմանությունը՝ Էմմա Չոբանյանի