07.10.2026 | 18:03
ԵՄ դեսպանները համաձայնեցրել են ՌԴ-ի դեմ պատժամիջոցների նոր՝ ռեկորդային ցուցակը
Իրանի ԱԳՆ-ն՝ Հայաստանի դեմ Իսլամական երկրների ընդունած հայտարարության մասին
Քաղաքականություն
30.06.2025 | 13:13
Իրանի ԱԳՆ մամուլի խոսնակ Էսմայիլ Բաղային այսօրվա ճեպազրույցում անդրադարձել է Իսլամական համագործակցության կազմակերպության հայտարարության մեջ Հայաստանի դեմ ընդունված կետերին, փոխանցում է Mehr գործակալությունը։
«Իսլամական համագործակցության կազմակերպության անդամ պետությունները կարող են կոլեկտիվ փաստաթղթերում բարձրացնել հարցեր, որոնք չեն արտացոլում առանձին անդամ պետությունների դիրքորոշումը: Մենք միշտ աջակցել ենք Հայաստանի և Ադրբեջանի միջև խաղաղությանը: Հարավային Կովկասում խաղաղությունն ու անվտանգությունը մեզ համար կարևոր են, մենք լավ հարաբերություններ ունենք երկու երկրների հետ։ Միևնույն ժամանակ, մենք հավանություն չենք տալիս այդ կոնկրետ կետում հասկացությունների և բառերի օգտագործմանը, մենք կարծում ենք, որ այդ բառերի օգտագործումը բացարձակապես տեղին չէ»,- ասել է նա։
Հիշեցնենք՝ Ադրբեջանի ԱԳՆ-ն տեղեկատվություն էր տարածել, որ Ստամբուլում կայացած Իսլամական համագործակցության կազմակերպության (ԻՀԿ) նախարարների խորհրդի 51-րդ նստաշրջանի վերջնական որոշումներում անդրադարձ է կատարվում նաև Հայաստանին։ Նշվում էր, որ նստաշրջանի արդյունքում ընդունվել է «Ստամբուլի հռչակագիրը», ինչպես նաև Բաքվի կողմից նախաձեռնված 5 բանաձև։ Դրանցից մեկը վերաբերում է, այսպես կոչված, «Արևմտյան Ադրբեջանի» համայնքին։
ՀՀ ԱԳՆ-ն էլ հայտարարություն էր տարածել՝ տեղեկացնելով, որ Երևանը խորապես հիասթափված է Իսլամական համագործակցության կազմակերպության նախարարական վերջին համաժողովի շրջանակում ընդունված «Ստամբուլի հռչակագրում» և Ադրբեջանի նախաձեռնությամբ ներկայացված բանաձևերում տեղ գտած խեղաթյուրված և ծայրահեղ միակողմանի ձևակերպումների առնչությամբ։
Թարգմանությունը՝ Էմմա Չոբանյանի
