Հաշմանդամություն ունեցող լիբանանցի զբոսաշրջիկների խումբը Հայաստանում է

Ամիսներ առաջ աջակցության խնդրանքով ՀՀ տնտեսական զարգացման և ներդրումների նախարարության զբոսաշրջության կոմիտեին դիմած լիբանանյան ընկերության մտադրությունը` հաշմանդամություն ունեցող զբոսաշրջիկների խումբ Հայաստան բերելու, իրականություն դարձավ:

ՀՀ տնտեսական զարգացումների ու ներդրումների նախարարությունից հայտնում են, որ 38 հոգուց բաղկացած հաշմանդամություն ունեցող զբոսաշրջիկների խումբն այսօր արդեն Հայաստանում է և 7 օրյա շրջագայության ընթացքում կճանապարհորդի և կբացահայտի Հայաստանն իր ողջ ներկապնակով` վայելելով հայկական ջերմ ընդունելությունն ու հյուրասիրությունը:

Զբոսաշրջիկների այցը Հայաստան հնարավոր դարձավ կազմակերպել Զբոսաշրջության պետական կոմիտեի, Երևանի քաղաքապետարանի, «Քրոս» առողջության կենտրոնի և Double Tree by Hilton Yerevan հյուրանոցի ակտիվ համագործակցության արդյունքում:

Զբոսաշրջության պետական կոմիտեն առանձնահատուկ շնորհակալություն է հայտնում Երևանի քաղաքապետ Տարոն Մարգարյանին և Երևանի քաղաքապետարանին զբոսաշրջիկների համար հարմարավետ տրանսպորտի տրամադրման, «Քրոս» առողջության կենտրոնին` անվասալյակների տրամադրման, իսկ Double Tree by Hilton Yerevan հյուրանոցին` հյուրերի կեցության հարմարավետությունն ապահովելու համար:

Երևանի տեսարժան վայրեր այցելած, հայկական ջերմ ընդունելությունից և հյուրասիրությունից հիացած լիբանանցի զբոսաշրջիկները Հայաստանից ստացած առաջին տպավորություններով կիսվել են Զբոսաշրջության պետական կոմիտեի ներկայացուցիչների հետ:

«Տպավորված ենք հայկական հոգատարությունից, հենց այդ հոգատարությունից էլ սկսվեց մեր ճանապարհորդությունը դեպի Հայաստան, այստեղ անվտանգ է, և դա մեզ շատ է դուր գալիս: Հայաստանում առաջին անգամ ենք, շատ հուզված ենք և դժվարանում ենք արտահայտել մեր ողջ զգացմունքները. լսել էինք հայկական կոնյակի և գինու մասին, լսել էինք վարդագույն տուֆի մասին և սեփական աչքով բացահայատեցինք նրա ողջ գեղեցկությունը, Մայր Հայաստանի արձանը տեսնելիս հուզվեցինք. այնքան ուժ կար արձանի մեջ. կնոջ կերպար, որը պաշտպանում է ողջ հայությանը»:

Զբոսաշրջիկները կլինեն նաև Գառնիում, Գեղարդում, Էջմիածնում, Խոր Վիրապում: