05.10.2026 | 23:19
Փաշինյանը նոր նշանակումներ է արել
Տորնադոն տան միջով անցավ, երեխեքը վախեցած էին. Ապարանի բնակիչ․ ՏԵՍԱՆՅՈՒԹ
Հասարակություն
16.06.2025 | 15:23
«Ավտոտնակի տանիքը տարավ, ապակիները ջարդեց, տորնադոն տան միջով անցավ, երեխաները վախից լացում էին», – Factor.am-ի հետ զրույցում ասում է Ապարանի բնակիչներից մեկը։
Պատմում է՝ տանիքը սարքել էին, այս տարի էլ ցանկանում էին ներսի աշխատանքներն անել և տեղափոխվել։ «Վնասը մեծ է, բայց դե ինչ անենք, աղետի դեմ բոլորս էլ անզոր ենք»
Ներքին գործերի նախարարությունից հայտնել են, որ հունիսի 16-ի ժամը 09։00-ի դրությամբ Ապարանում վնասվել է 20 բազմաբնակարան շենքի, 86 առանձնատան, 3 դպրոցի, 1 մշակույթի տան, իրավապահ կառույցների 2 տարածքային ստորաբաժանման ու 24 կազմակերպության վարչական շենքերի տանիքներ։ Բացի այդ, վնասվել է 70 էլեկտրասյուն, 30 տրանսպորտային միջոց, 2 խաղահրապարակ։ Տապալվել է 100-ից ավել ծառ:
Ապարանի ավերիչ պտտահողմից հետո այսօր քաղաքում վնասների գնահատման ու վերականգնման աշխատանքներ էին տարվում։ Factor TV-ն շրջել է քաղաքում և արձանագրել, որ բազմաթիվ բնակիչների տներում կոտրվել են պատուհանները, վնասվել են պատերն ու արտաքին հարդարանքը: Տուժել են նաև հանրային նշանակության շենքեր, դպրոցներ, հանրային սննդի կետեր, պոկվել են ծառեր և սյուներ։ Քաղաքում այսօր գազը վերականգնվել է, սակայն դեռ չկա էլեկտրականությունը։ Ապարանում պտտահողմի հետևանքով 4 անձ մարմնական վնասվածքներ է ստացել, նրանցից մեկն անչափահաս է։
Մանրամասները՝ տեսանյութում։
Անի Թամրազյան
