31.10.2026 | 13:33
Ամերիկյան ինդեքսները նվազել են
Շենգավիթի թաղապետը թողնում է պաշտոնը
Քաղաքականություն
10.06.2025 | 16:13
Շենգավիթ վարչական շրջանի ղեկավար Ռազմիկ Մկրտչյանը ազատվել է աշխատանքից։ Այդ մասին նա հայտնել է ֆեյսբուքյան գրառմամբ, որում մասնավորապես նշվում է․
«Սիրելի՛ շենգավիթցիներ, 2018 թվականից ստանձնելով Շենգավիթ վարչական շրջանի ղեկավարի բարդ և պատասխանատու պաշտոնը՝ միասին ահռելի նախաձեռնություններ և ծրագրեր ենք կյանքի կոչել, բազմաթիվ առաջարկներից եմ հրաժարվել, որպեսզի շարունակեմ ծառայել վարչական շրջանին՝ նպաստելով համայնքի բարեկեցությանը, սակայն երկարատև ժամանակ է իմ աշխատանքային ճանապարհը որպես Շենգավիթ վարչական շրջանի ղեկավար դադարեցնելու միտք կար և այսօր եկել է այն պահը, որ տեղեկացնեմ ձեզ իմ աշխատանքային պարտականությունները դադարեցնելու որոշման մասին։
Շտապեմ նշել՝ խուսափելով շահարկումներից, որ պատճառներն անձնական են և անձնական խնդիրներից զատ այլ հանգամանքներով չպայմանավորված։ Շնորհակալ եմ վարչական շրջանի ղեկավարի աշխատակազմին՝ համատեղ թիմային և սրտացավ աշխատանքի համար, համայնքային բոլոր գերատեսչություններին՝ արդյունավետ համագործակցության համար, շենգավիթցիներին՝ անվերապահ վստահության և աջակցության համար։
Շնորհակալություն եմ հայտնում Շենգավիթ վարչական շրջանի ղեկավարի պաշտոնը ինձ վստահելու և թույլ տալու իմ համեստ ներդրումն ունենալ համայնքի զարգացման նվիրական գործում»։
Մկրտչյանը Շենգավիթ վարչական շրջանի ղեկավարի պաշտոնին նշանակվել էր 2018 թվականի նոյեմբերին։ 2022 թվականի հունվարի 24-ին վերանշանակվել էր նույն պաշտոնում:
