16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Թեհրանը շուտով Օմանի միջոցով առաջարկ կփոխանցի ԱՄՆ-ին․ Իրանի ԱԳՆ
Քաղաքականություն
09.06.2025 | 15:24
Թեհրանը շուտով Օմանի միջոցով կներկայացնի միջուկային համաձայնագրի վերաբերյալ իր սեփական առաջարկը՝ կոչ անելով Վաշինգտոնին չկորցնել այս հնարավորությունը։ Այս մասին հայտարարել է Իրանի ԱԳՆ խոսնակ Էսմայիլ Բաղային, գրում է Mehr գործակալությունը։
Երկուշաբթի մամուլի ասուլիսի ժամանակ Բաղային անդրադարձել է Թեհրանի և Վաշինգտոնի միջև անուղղակի միջուկային բանակցությունների վերջին զարգացումներին։ ԱՄՆ-ը և Իրանը ապրիլի 12-ից ի վեր անցկացրել են միջուկային բանակցությունների հինգ փուլ և սպասվում է, որ նրանք կրկին կհանդիպեն՝ նոր համաձայնագրի հասնելու նպատակով բանակցությունների։
Երկու երկրները տարաձայնություններ ունեն ուրանի հարստացման մակարդակի շուրջ։
«Չի կարելի ասել, որ հարստացմամբ զբաղվող յուրաքանչյուր երկիր անպայման ունի զենքի ծրագիր։ Ներկայում շատ երկրներ, այդ թվում՝ ԱՄՆ որոշ դաշնակիցներ, զբաղվում են հարստացմամբ, բայց չունեն որևէ ռազմական կամ զենքի ծրագիր։ Եթե զսպումը վերաբերում է Իրանի դիմադրությանն արտաքին չափազանց պահանջներին, ապա այո՛, մեր դիրքորոշումը ծառայում է որպես զսպող միջոց ճնշման դեմ, որը գերազանցում է իրավական և միջազգային նորմերը»,- ասել է իրանցի դիվանագետը։
Բաղային ընդգծել է, որ հարստացումը ռազմավարական անհրաժեշտություն է Իրանի միջուկային արդյունաբերության համար և ծառայում է երկրի ազգային շահերին։
«Այս տեղական տեխնոլոգիան մշակվել է իրանցի գիտնականների տասնամյակների ջանքերի շնորհիվ, և այն ոչ մի կերպ բաց թեմա չէ բանակցությունների կամ փոխզիջման համար։ Այս պահին ես լրագրողների հետ բանակցությունների վեցերորդ փուլի վերաբերյալ որևէ կոնկրետ բան չունեմ կիսվելու. եթե որոշում կայացվի, այն կհայտարարվի ավելի ուշ»,- հավելել է Բաղային։
Նա նաև նշել է, որ Իրանի ազգային շահերը չապահովող ցանկացած առաջարկ անընդունելի է և հայտնել, որ Իրանը շուտով կներկայացնի իր սեփական առաջարկը Օմանի միջոցով։
«Մենք խստորեն խորհուրդ ենք տալիս ամերիկյան կողմին չկորցնել այս հնարավորությունը։ Նրանց շահերից է բխում այն լուրջ ընդունելը»,- ասել է Իրանի ԱԳՆ խոսնակը։
Ավելի վաղ ԱՄՆ նախագահ Դոնալդ Թրամփը հայտարարել էր, որ Իրանի հետ հնարավոր միջուկային համաձայնագիրը բացառում է ուրանի հարստացումը։ ԱՄՆ-ի և Իրանի միջև ներկայում քննարկվող հնարավոր համաձայնագրի համաձայն՝ Վաշինգտոնը «չի թույլատրի ուրանի որևէ հարստացում»։
Իրանի գերագույն հոգևոր առաջնորդ Ալի Խամենեին էլ նշել է, որ ԱՄՆ-ը ոչինչ չի կարող անել Թեհրանի միջուկային ծրագրի հետ կապված։
Թարգմանությունը՝ Էմմա Չոբանյանի
