Թրամփը հայտարարել է, որ Իրանի հետ գործարքի շրջանակում ԱՄՆ-ն ուրանի հարստացում թույլ չի տա

ԱՄՆ նախագահ Դոնալդ Թրամփը հայտարարել է, որ Իրանի հետ հնարավոր միջուկային համաձայնագիրը բացառում է ուրանի հարստացումը։ ԱՄՆ-ի և Իրանի միջև ներկայում քննարկվող հնարավոր համաձայնագրի համաձայն՝ Վաշինգտոնը «չի թույլատրի ուրանի որևէ հարստացում»։ Այս մասին Թրամփը գրել է Truth Social սոցցանցում, գրում է DW-ի ռուսական ծառայությունը։

Այս հայտարարության առիթ է հանդիսացել Axios-ի հրապարակումը, ըստ որի՝ Վաշինգտոնի առաջարկը թույլ է տալիս Թեհրանին սահմանափակ կերպով հարստացնել ուրանը։

Ապրիլի կեսերին Միացյալ Նահանգները և Իրանը բանակցություններ են սկսել Թեհրանի միջուկային ծրագրի վերաբերյալ հնարավոր նոր համաձայնագրի շուրջ։ Բանակցությունների առաջին հինգ փուլերը ոչ մի արդյունք չեն տվել։

Երկուշաբթի Թրամփն իր նախորդին՝ ԱՄՆ նախկին նախագահ Ջո Բայդենին մեղադրել է ստեղծված իրավիճակի համար՝ ասելով, որ Բայդենը «պետք է վաղուց խանգարեր» Իրանին՝ հարստացնել ուրանը։

Ուրանի հարստացումը մնում է բանակցությունների հիմնական վիճելի հարցը։ Մինչ Թեհրանը բազմիցս հայտարարել է, որ ուրանի հարստացումը որպես իր «խաղաղ միջուկային ծրագրի» մաս անքննարկելի է, ԱՄՆ-ն այն անվանել է «կարմիր գիծ»։

Այնուամենայնիվ, ըստ Axios-ի, Վաշինգտոնի կողմից մայիսի 31-ին Թեհրանին փոխանցված վերջին առաջարկը ներառում է սահմանափակ, ցածր մակարդակի հարստացման հնարավորություն։ Նման թույլտվության ժամկետը կարող է քննարկման առարկա դառնալ։

Արևմտյան երկրները տարիներ շարունակ մեղադրել են Իրանին միջուկային զենք մշակելու մեջ։ Թեհրանը հերքում է մեղադրանքները։ Մայիսի 31-ին Ատոմային էներգիայի միջազգային գործակալությունը հրապարակել է զեկույց, որ Իրանը վերջին երեք ամիսների ընթացքում զգալիորեն մեծացրել է ուրանի պաշարները՝ հարստացված մինչև 60 տոկոսի չափով։ Ատոմային զենք արտադրելու համար անհրաժեշտ հարստացման մակարդակը մոտ 90 տոկոս է։ Կառույցը «լուրջ մտահոգություն» է հայտնել Թեհրանի ուրանի հարստացման մակարդակի վերաբերյալ։ Գործակալությունը նաև քննադատել է Թեհրանի՝  ՄԱԳԱՏԷ-ի  հետ վատ համագործակցությունը Իրանի միջուկային ծրագիրը վերահսկելու հարցում։

Թարգմանությունը՝ Էմմա Չոբանյանի