15.10.2026 | 20:18
Սեդրակ Առուստամյանի կալանքը երկարաձգվեց ևս 3 ամսով
ԱՄՆ-ը ոչինչ չի կարող անել Թեհրանի միջուկային ծրագրի հետ կապված․ Իրանի հոգևոր առաջնորդ
Քաղաքականություն
04.06.2025 | 14:11
Իրանի պատասխանը Ամերիկայի անհեթեթ պնդումներին հստակ է՝ նրանք ոչինչ չեն կարող անել։ Այս մասին հայտարարել է Իրանի գերագույն հոգևոր առաջնորդ Ալի Խամենեին՝ անդրադառնալով Թեհրանի խաղաղ միջուկային ծրագրի դեմ Վաշինգտոնի պնդումներին, գրում է Mehr գործակալությունը։
«Ամերիկայի դիրքի կտրուկ անկումն աշխարհում պայմանավորված է նրա ներկայությամբ, իսկ սիոնիստների նկատմամբ ատելությունը՝ նրա հեղափոխությամբ։ Այսօր արևմտյան աշխարհում դուք տեսնում եք արևմտյան արժեքների նկատմամբ հակակրանքի շարժում. Իմամը ստեղծել է նման հեղափոխություն»,- ասել է Խամենեին Իմամ Խոմեյնիի մահվան 36-րդ տարելիցի հիշատակի արարողության ժամանակ։
Ինչ վերաբերում է Իրանի խաղաղ միջուկային ծրագրի դեմ ԱՄՆ-ի պնդումներին, Խամենեին ասել է․ «ԱՄՆ-ի առաջին խոսքն այն է, որ Իրանը չպետք է ունենա միջուկային արդյունաբերություն: Ամերիկայի անհեթեթ պնդումներին մեր պատասխանը հստակ է. նրանք այս հարցում ոչինչ չեն կարող անել։ Ատոմային արդյունաբերությունն անդրադառնում է բազմաթիվ գիտական ոլորտների վրա: Ուրանի հարստացումը միջուկային խնդրի բանալին է, և թշնամիները կենտրոնացել են հարստացման վրա»:
Նա նաև հայտարարել է՝ իսլամական կառավարությունները պարտավորություններ ունեն պաղեստինյան հարցի հետ կապված, «այսօր քաղաքավարության կամ չեզոքության ժամանակը չէ»։
«Նրանք մարդկանց սպանում են ռումբերով և փամփուշտներով։ Ամերիկան մեղսակից է այս հանցագործությանը և պետք է վտարվի տարածաշրջանից։ Եթե որևէ իսլամական պետություն որևէ կերպ աջակցի սիոնիստական ռեժիմին, նրա ճակատին կմնա հավերժական ամոթը»,- հայտարարել է Իրանի հոգևոր առաջնորդը։
Հիշեցնենք՝ նախօրեին ԱՄՆ նախագահ Դոնալդ Թրամփը հայտարարել էր, որ Իրանի հետ հնարավոր միջուկային համաձայնագիրը բացառում է ուրանի հարստացումը։ ԱՄՆ-ի և Իրանի միջև ներկայում քննարկվող հնարավոր համաձայնագրի համաձայն՝ Վաշինգտոնը «չի թույլատրի ուրանի որևէ հարստացում»։
Թարգմանությունը՝ Էմմա Չոբանյանի
