08.09.2026 | 13:18
Քոչարյանի հետ կապվող բրենդային խանութում 9,46 մլրդ դրամի թաքցված շրջանառություն է բացահայտվել․ ՊԵԿ․ ՏԵՍԱՆՅՈՒԹ
Հարավային Կորեայի նախագահական ընտրություններում հաղթել է ընդդիմադիր թեկնածուն
Քաղաքականություն
04.06.2025 | 12:09
Հարավային Կորեայում ընդդիմադիր լիբերալ «Տոբուրո» դեմոկրատական կուսակցության թեկնածու Լի Ջե Մյոնը հաղթել է արտահերթ նախագահական ընտրություններում՝ հավաքելով ձայների 49,2 տոկոսը։ Այս մասին հայտնել է երկրի Ազգային ընտրական հանձնաժողովը քվեաթերթիկների 96,74 տոկոսի հաշվարկից հետո, գրում է DW-ի ռուսական ծառայությունը։
Նրա գլխավոր մրցակիցը՝ պահպանողական «Ժողովրդի իշխանություն» կուսակցությունից Կիմ Մուն Սուն, ստացել է ձայների 41,4 տոկոսը։ Նա ընդունել է պարտությունը։
«Ես խոնարհաբար կընդունեմ ժողովրդի որոշումը»,- ասել է Մուն Սուն լրագրողներին և շնորհավորել հաղթած թեկնածուին։
Հարավային Կորեայում անցկացված 21-րդ նախագահական ընտրություններում ընտրողների մասնակցությունը կազմել է 79,4 տոկոս, ինչն ամենաբարձր ցուցանիշն է 1997 թվականից ի վեր։
Հարավային Կորեայում արտահերթ նախագահական ընտրությունները տեղի ունեցան նախկին նախագահ Յուն Սոկ Յոլի պաշտոնանկությունից հետո 2024 թվականի վերջին։ Յոլին իմփիչմենթ էր հայտարարվել այն բանից հետո, երբ նա 2024 թվականի դեկտեմբերի սկզբին փորձել էր երկրում ռազմական դրություն մտցնել: Հունվարին նա ձերբակալվել էր դատարանի որոշմամբ, երբ չէր ներկայացել իր գործով հարցաքննության:
Մարտի սկզբին դատարանը նրան ազատ էր արձակել կալանքից՝ բավարարելով պաշտպանական կողմի պահանջը։
Թարգմանությունը՝ Էմմա Չոբանյանի
