Կրեմլում նշել են Ուկրաինայի հարցով Պուտինի, Թրամփի ու Զելենսկիի բանակցությունների պայմանը

ՌԴ նախագահ Վլադիմիր Պուտինի, Ուկրանայի նախագահ Վլադիմիր Զելենսկիի  և ԱՄՆ նախագահ Դոնալդ Թրամփի միջև ուկրաինական կարգավորման վերաբերյալ ուղիղ բանակցություններ կարող են տեղի ունենալ միայն Ռուսաստանի և Ուկրաինայի պատվիրակությունների միջև բանակցություններում արդյունքների հասնելուց հետո։ Այս մասին ճեպազրույցի ժամանակ հայտարարել է Կրեմլի խոսնակ Դմիտրի Պեսկովը, գրում է ՏԱՍՍ-ը։

«Պուտինը բազմիցս ասել է, որ ինքը սկզբունքորեն կողմ է ամենաբարձր մակարդակով շփումներին, իհարկե, դրանք պահանջված են, բայց դրանք պետք է պատրաստված լինեն, և նախ պետք է արդյունքի հասնել երկու երկրների պատվիրակությունների միջև ուղիղ բանակցություններում: Եթե նման արդյունքի հասնեն, և երբ այն ձեռք բերվի, ապա, իհարկե, կարող ենք խոսել ամենաբարձր մակարդակով շփումների մասին»,- ասել է Կրեմլի խոսնակը։

Նա այսպես է մեկնաբանել Թուրքիայի արտգործնախարար Հաքան Ֆիդանի խոսքերը, որը Կիևում հույս էր հայտնել, որ Ռուսաստանը և Ուկրաինան Ստամբուլում հունիսի 2-ին կկարողանան ավարտել բանակցությունների տեխնիկական փուլը, որից հետո կարող է անցկացվել Թուրքիայի, ԱՄՆ-ի, Ռուսաստանի և Ուկրաինայի ղեկավարների հանդիպում։

Բացի այդ, Պեսկովը հայտարարել է, որ Ռուսաստանի պատվիրակությունը պատրաստ կլինի հունիսի 2-ի առավոտից Ստամբուլում ուկրաինական կարգավորման շուրջ բանակցությունները շարունակելու համար։

«Ռուսաստանի բանակցողների պատվիրակությունը մեկնում է Ստամբուլ և պատրաստ կլինի երկուշաբթի առավոտից շարունակել բանակցությունների երկրորդ փուլը»,- ասել է նա։

Պեսկովը նաև հավելել է, որ խաղաղ կարգավորման վերաբերյալ հուշագրի ո՛չ ռուսական, ո՛չ էլ ուկրաինական տարբերակը չի հրապարակվի։

Այնուամենայնիվ, նա չի պատասխանել հարցին, թե երբ է Ռուսաստանը փաստաթուղթը հանձնելու Ուկրաինային։

Կիևը դեռևս պաշտոնապես չի հաստատել իր մասնակցությունը բանակցություններին, սակայն Ուկրաինայի նախագահի աշխատակազմի ղեկավար Անդրեյ Երմակը հայտարարել է, որ Կիևը պատրաստ է նոր փուլին, բայց որպեսզի զրույցը կառուցողական լինի, ուկրաինական պատվիրակությունը պետք է նախապես ծանոթանա ռուսական հուշագրին։

Մայիսի 28-ին Ռուսաստանի արտաքին գործերի նախարար Սերգեյ Լավրովը հայտարարել էր, որ Ռուսաստանն առաջարկում է Ուկրաինային հունիսի 2-ին Ստամբուլում անցկացնել ուղիղ բանակցությունների երկրորդ փուլ։ Նրա խոսքով՝ Մոսկվան պատրաստել է հուշագիր, որը ներկայացնում է իր դիրքորոշումը «ճգնաժամի արմատական ​​պատճառների հուսալի հաղթահարման բոլոր ասպեկտների վերաբերյալ», որի շուրջ կողմերը համաձայնության էին եկել բանակցությունների առաջին փուլի ընթացքում։ Ուկրաինան պնդում է, որ Ռուսաստանը նախապես հանձնի փաստաթուղթը։

Հիշեցնենք, որ Ստամբուլում մայիսի 16-ին տեղի է ունեցել բանակցությունների առաջին փուլը։

Թարգմանությունը՝ Էմմա Չոբանյանի