17.12.2025 | 14:05
Ուշ գիշերին եմ մասնակցել նիստին, թեկնածությունս հաստատվել է. Տիգրան Պարսիլյան․ ՏԵՍԱՆՅՈՒԹ
Շոյգուն Ստամբուլն անվանել է ՌԴ-ի և Ուկրաինայի միջև բանակցությունների գլխավոր հարթակ
Քաղաքականություն
29.05.2025 | 15:33
Ստամբուլը դառնում է Ռուսաստանի և Ուկրաինայի միջև բանակցությունների գլխավոր վայրը։ Այս մասին հայտարարել է ՌԴ Անվտանգության խորհրդի քարտուղար Սերգեյ Շոյգուն, փոխանցում է ՏԱՍՍ-ը։
«Ստամբուլի հարթակը դառնում է բոլոր ուղղություններում՝ Սև ծովի, Սևծովյան համաձայնագրի, հացահատիկի համաձայնագրի, իսկ հիմա՝ ռուս-ուկրաինական բանակցությունների վերաբերյալ բանակցություններ վարելու հիմնական հարթակը»,- ասել է Շոյգուն Թուրքիայի Ազգային անվտանգության խորհրդի գլխավոր քարտուղար Օքայ Մեմիշի հետ հանդիպման ժամանակ։
Նա նաև շնորհակալություն է հայտնել Թուրքիայի ղեկավարությանը ռուս-ուկրաինական բանակցությունների նպատակով Ստամբուլի հարթակը տրամադրելու համար։
Ինչ վերաբերում է ռուս-թուրքական հարաբերություններն, Շոյգուի խոսքով՝ «քաղաքական երկխոսությունն ակտիվորեն զարգանում է բոլոր ոլորտներում»։
«Մեզ Անկարայի հետ կապում է առևտրի, տնտեսական և էներգետիկ ոլորտներում համատեղ խոշոր նախագծերի հաջող իրականացումը»,- նշել է ՌԴ Անվտանգության խորհրդի քարտուղարը։
Ըստ նրա՝ երկկողմ համագործակցության արդյունավետությունը «մեծ մասամբ պայմանավորված է երկու երկրների ղեկավարների միջև վստահության վրա հիմնված երկխոսության ինտենսիվությամբ, նախագահներ Վլադիմիր Պուտինը և Ռեջեփ Թայիփ Էրդողանը պարբերաբար հեռախոսազրույցներ են ունենում»։
Հիշեցնենք, որ մայիսի 16-ին Ստամբուլում կայացել էին ռուս-ուկրաինական բանակցությունները, որոնց ընթացքում ռուսական պատվիրակությունը գլխավորում էր ՌԴ նախագահի օգնական Վլադիմիր Մեդինսկին, իսկ ուկրաինական պատվիրակությունը՝ պաշտպանության նախարար Ռուստեմ Ումերովը: Հանդիպման միակ իրական արդյունքը գերիների փոխանակումն էր՝ «1000-ը 1000-ի դիմաց» բանաձևով, որն ավարտվել է մայիսի 25-ին։
Նախօրեին էլ ՌԴ ԱԳ նախարար Սերգեյ Լավրովն Ուկրաինային առաջարկել էր հունիսի 2-ին Ստամբուլում անցկացնել ուղիղ բանակցությունների երկրորդ փուլը։
Թարգմանությունը՝ Էմմա Չոբանյանի
