Քաղաքականություն
28.05.2025 | 14:19
Իրանը կարող է թույլ տալ ՄԱԿ-ի ատոմային էներգիայի վերահսկող մարմնին՝ ԱՄՆ տեսուչների ուղարկել իրանական օբյեկտներ, եթե Թեհրանի և Վաշինգտոնի բանակցությունները հաջողությամբ պսակվեն, հայտարարել է Իրանի միջուկային ծրագրի ղեկավար Մոհամմադ Էսլամին, հայտնում է Reuters-ը, որին վկայակոչում է Al Arabiya-ն։
Սպասվում է, որ Թեհրանը և Վաշինգտոնը կանցկացնեն բանակցությունների վեցերորդ փուլը՝ Իրանի միջուկային ծրագրի շուրջ տասնամյակներ շարունակվող վեճը լուծելու համար, իսկ ԱՄՆ նախագահ Դոնալդ Թրամփը կանխատեսում է «լավ լուրեր»։
«Բնական է, որ թշնամական երկրների տեսուչներին թույլ չեն տալիս մուտք գործել, բայց եթե միջուկային համաձայնագիր կնքվի, մենք կարող ենք թույլ տալ Ատոմային էներգիայի միջազգային գործակալության համար աշխատող ամերիկացի տեսուչներին՝ այցելել մեր միջուկային օբյեկտներ»,- Թեհրանում կայացած մամուլի ասուլիսում ասել է Էսլամին։
Երկու երկրները բախվում են Իրանի կողմից ուրանի հարստացման ծրագրի շուրջ խնդիրների, որը Վաշինգտոնը համարում է միջուկային զենքի ձեռքբերման հնարավոր ուղի և պնդում դրա սահմանափակման հարցում։ Թեհրանը պնդում է, որ իր միջուկային ծրագիրը բացառապես քաղաքացիական նպատակներով է և իր հարստացման արդյունաբերությունը համարում է կարմիր գիծ։
«Հարստացումը երկրի միջուկային արդյունաբերության հիմքն ու հենասյունն է։ Ենթադրենք, որ ինչ-որ մեկին թույլատրվում է ունենալ էլեկտրակայան և ցանց, բայց թույլ չի տրվում կառուցել էլեկտրակայան»,- նշել է Էսլամին։
Հավելենք, որ ավելի վաղ էլ Իրանի գերագույն հոգևոր առաջնորդի ավագ խորհրդական Ալի Շամխանին հայտարարել էր, որ Իրանը պատրաստ է որոշակի պայմաններով, տնտեսական պատժամիջոցների վերացման դիմաց միջուկային գործարք կնքել ԱՄՆ-ի հետ։
Թարգմանությունը՝ Էմմա Չոբանյանի
