ՌԴ-ն գիշերը ռեկորդային թվով անօդաչու թռչող սարքերով գրոհել է Ուկրաինան

Ռուսաստանի գիշերային հարձակումը Ուկրաինայի վրա անօդաչու թռչող սարքերի ամենախոշոր գրոհն էր ավելի քան երեք տարվա պատերազմի ընթացքում։ Այս մասին հաղորդում է Reuters-ը՝ հղում անելով Ուկրաինայի ռազմաօդային ուժերի ներկայացուցչին, գրում է BBC-ի ռուսական ծառայությունը։

Կիրակի երեկոյից ի վեր Ռուսաստանը 355 անօդաչու թռչող սարք է արձակել՝ նախորդ օրվա 298-ի համեմատ։

Միաժամանակ, կիրակի օրվա հարձակումն ամենամեծն էր՝ հաշվի առնելով հրթիռների քանակը։ Ուկրաինայի Ռազմաօդային ուժերի հաղորդագրությունների համաձայն, ընդհանուր առմամբ, արձակվել է 367 օդային հարձակման զինատեսակ, իսկ երկուշաբթի գիշերը՝ 364։

Ուկրաինայի ռազմաօդային ուժերը հայտարարել են, որ ռուսական հարձակումն իրականացվել է Բրյանսկից, Միլլերովոյից, Կուրսկից, Օրյոլից, Շատալովոյից, Պրիմորսկո-Ախտարսկից, ինչպես նաև բռնակցված Ղրիմից արձակված 355 անօդաչու թռչող սարքերի միջոցով։ Բացի այդ, ռուսներն օգտագործել են 9 Kh-101 օդային արձակման թևավոր հրթիռներ, որոնք արձակվել են Ту-95MS ռազմավարական ավիացիոն ինքնաթիռներից։

Նախնական տվյալներով՝ ուկրաինական ստորաբաժանումները խոցել են բոլոր թևավոր հրթիռները, չեզոքացրել 288 «Շահեդ» և այլ տեսակի անօդաչու թռչող սարքեր։

Ռազմաօդային ուժերի խոսնակ Յուրի Իգնատը AFP-ին ասել է, որ անօդաչու թռչող սարքերի հարձակումն ամենամեծն էր Ռուսաստանի կողմից Ուկրաինա ներխուժումի մեկնարկից ի վեր։

Ավելի վաղ հաղորդվել էր Ուկրաինայի մի շարք շրջաններում ավերածությունների և զոհերի մասին։

Թարգմանությունը՝ Էմմա Չոբանյանի