18.02.2026 | 10:47
Այսօր սպասում ենք այս փետրվարի ամենատաք օրերից մեկը. Գագիկ Սուրենյան
ՌԴ զորքերը կրկին հարվածել են Ուկրաինային․ ամբողջ երկրում օդային հարձակման տագնապի ազդանշաններ են հնչել
Քաղաքականություն
26.05.2025 | 11:43
Ռուսական զորքերը մայիսի լույս 26-ի գիշերը կրկին հարվածներ են հասցրել Ուկրաինայի տարածքին։ Ամբողջ երկրում հնչել են օդային հարձակման ազդանշաններ։ Հակաօդային պաշտպանության ուժերն աշխատել են Կիևի և Խարկովի վրա։ Խարկովում լսվել է տասից ավելի պայթյուն, փոխանցում է Current time-ը։
Հարվածների մասին տեղեկատվությունը հաստատել է Խարկովի մարզային ռազմական վարչակազմի ղեկավար Օլեգ Սինեգուբովը։
«Խարկովը և արվարձանները հակառակորդի անօդաչու թռչող սարքերի հարձակման տակ են։ Քաղաքի որոշ հատվածներում լսվել են հզոր պայթյուններ»,- գրել է նա։
Կիևի և Խարկովի իշխանությունները հարձակման հետևանքների կամ հնարավոր վիրավորների մասին չեն հայտնել։
Օդեսայի մարզում անօդաչու թռչող սարքի հարվածի հետևանքով տուն է ավերվել, հայտնել է Ուկրաինայի արտակարգ իրավիճակների պետական ծառայությունը։ Բացի այդ, վնասվել են բնակելի շենքերի, օժանդակ շինությունների, ավտոտնակների, մեքենաների տանիքներ, ցանկապատ և գազատար։ Վիրավորների մասին տեղեկություններ չեն հաղորդվում։
Զապորոժիեի շրջանում Յուրկովկա գյուղում երկու մարդ վիրավորվել է։ Այս մասին հայտնել է տեղի ռազմական վարչակազմի ղեկավար Իվան Ֆյոդորովը։
«Կեսգիշերից հետո թշնամին հարվածել է Յուրկովկա գյուղին։ Հարվածել է մասնավոր տանը, այն ավերվել է։ Պայթյունի ալիքը վնասել է մոտակա տներն ու մեքենաները։ Վիրավորվել են 60-ամյա կին և 52-ամյա տղամարդ։ Տուժածներին ցուցաբերվել է անհրաժեշտ բժշկական օգնություն»,- նշել է նա։
Խմելնիցկիի շրջանում էլ վնասվել են մասնավոր տներ և բիզնեսներ, նախնական տվյալներով՝ տուժածներ չկան։ Այս մասին հայտնել է տարածաշրջանային ռազմական վարչակազմի ղեկավար Սերգեյ Տյուրինը։
Ուշ երեկոյան ռուսական զորքերը հրետանային կրակ են բացել Սումիի մարզի Կոնդրատովկա գյուղի վրա, մեկ զոհ կա։ Այս մասին հայտնել է տեղի ռազմական վարչակազմը։ Զոհը 48-ամյա բնակիչ է։ Վիրավորվել է ևս մեկ քաղաքացիական անձ՝ 52-ամյա տղամարդ։ Նրան տեղում առաջին բուժօգնություն են ցուցաբերել։
«Կրկնակի հարվածների սպառնալիքի պատճառով վիրավորին հիվանդանոց տեղափոխելը դեռևս հնարավոր չէ։ Երբ վտանգավոր իրավիճակը թույլ տա, նա կհոսպիտալացվի»,- հայտնել են վարչակազմից։
Թարգմանությունը՝ Էմմա Չոբանյանի
