16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Հռոմում մեկնարկել է Իրան-ԱՄՆ անուղղակի բանակցությունների 5-րդ փուլը
Քաղաքականություն
23.05.2025 | 17:36
Իրանի և ԱՄՆ-ի բանակցային թիմերը Իտալիայի մայրաքաղաք Հռոմում անցկացնում են անուղղակի բանակցությունների հինգերորդ փուլը։ Նախորդ փուլերի նման, այս դեպքում նույնպես միջնորդն Օմանն է, գրում է Mehr գործակալությունը։
Բանակցություններն ընթանում են Հռոմում Օմանի դեսպանատանը։
Իրանական բանակցային թիմը գլխավորում է արտաքին գործերի նախարար Աբբաս Արաղչին, իսկ ԱՄՆ պատվիրակությունը՝ ԱՄՆ նախագահի Մերձավոր Արևելքի հարցերով հատուկ բանագնաց Սթիվ Ուիթկոֆը։
Հռոմ մեկնելուց առաջ X-ում արված գրառման մեջ Արաղչին ընդգծել էր, որ եթե ԱՄՆ-ը պնդի Իրանում ուրանի զրոյական հարստացման հարցում, համաձայնագիր չի կնքվի։
Հանդիպման մեկնարկից առաջ էլ Իրանի արտաքին գործերի նախարարության խոսնակ Էսմայիլ Բաղային իրանական հեռուստատեսությանը հայտնել է, որ «Իրանը լրջորեն և վճռականորեն կներկայացնի իր օրինական դիրքորոշումները խաղաղ միջուկային էներգիայի օգտագործման և պատժամիջոցների վերացման վերաբերյալ»։
Իրանն ու ԱՄՆ-ը մինչ օրս անցկացրել են միջուկային բանակցությունների հարցով չորս փուլ (երեքը՝ Մասկատում և մեկը՝ Հռոմում)՝ Օմանի արտաքին գործերի նախարար Սեյիդ Բադր բին Համադ ալ-Բուսաիդիի միջնորդությամբ։
Թարգմանությունը՝ Էմմա Չոբանյանի
