09.08.2026 | 00:05
Էդգար Սևիկյանը խաղացել է Մադրիդի «Ռեալի» դեմ. ՏԵՍԱՆՅՈՒԹ
Իրանի ԱԳ նախարարը մեկնել է Հռոմ՝ ԱՄՆ-ի հետ բանակցությունների
Քաղաքականություն
23.05.2025 | 12:41
Իրանի արտաքին գործերի նախարար Աբբաս Արաղչին մեկնել է Իտալիայի մայրաքաղաք Հռոմ՝ մասնակցելու ԱՄՆ նախագահի հատուկ բանագնաց Սթիվ Ուիթկոֆի հետ անուղղակի բանակցությունների հինգերորդ փուլին, որոնք անցկացվում են Օմանի միջնորդությամբ, գրում է Mehr գործակալությունը։
Իրանի բարձրաստիճան դիվանագետը գլխավորում է իրավունքի, քաղաքականության, բանկային և ֆինանսների փորձագետներից բաղկացած քաղաքական պատվիրակությունը։ Նշվում է, որ Իրանի քաղաքական հարցերով արտաքին գործերի փոխնախարար Մաջիդ Թախտ-Ռավանչին, իրավական և միջազգային հարցերով փոխարտգործնախարար Քազեմ Ղարիբաբադին, Իրանի արտաքին գործերի նախարարության մամուլի խոսնակ Էսմայիլ Բաղային և մի շարք այլ դիվանագետներ ու փորձագետներ են ուղեկցում Արաղչիին։
Իրանն ու ԱՄՆ-ը մինչ օրս անցկացրել է միջուկային բանակցությունների չորս փուլ (երեքը՝ Մասկատում և մեկը՝ Հռոմում)՝ Օմանի արտաքին գործերի նախարար Սեյիդ Բադր բին Համադ ալ Բուսաիդիի միջնորդությամբ։
Ապրիլին սկսված բանակցությունները երկու երկրների միջև ամենաբարձր մակարդակի շփումներն են այն բանից հետո, երբ Միացյալ Նահանգները միակողմանիորեն դուրս էր եկել 2015 թվականի միջուկային համաձայնագրից՝ նախագահ Դոնալդ Թրամփի առաջին ժամկետի ընթացքում։
Ավելի վաղ Արաղչին հայտարարել էր, որ իրանական պատվիրակությունը վերանայում է բանակցությունների հինգերորդ փուլի առաջարկվող ժամանակն ու վայրը, չնայած նա ընդգծել էչ երկրի վճռականությունը՝ դիմադրելու ԱՄՆ չափազանց պահանջներին։ Օմանի արտաքին գործերի նախարարն էլ ավելի ուշ հայտարարել էր, որ բանակցությունների հինգերորդ փուլը տեղի կունենա Հռոմում ուրբաթ օրը։
Հիշեցնենք, որ նախօրեին էլ Արաղչին նամակ էր հղել ՄԱԿ-ի գլխավոր քարտուղարին՝ Իրանի միջուկային օբյեկտներին Իսրայելի հնարավոր հարվածների հետ կապված՝ նշելով, որ հարձակման դեպքում Թեհրանը ԱՄՆ-ին պատասխանատու և մասնակից կհամարի։
Թարգմանությունը՝ Էմմա Չոբանյանի
