08.09.2026 | 13:18
Քոչարյանի հետ կապվող բրենդային խանութում 9,46 մլրդ դրամի թաքցված շրջանառություն է բացահայտվել․ ՊԵԿ․ ՏԵՍԱՆՅՈՒԹ
Ռումինիայի ՍԴ-ն մերժել է նախագահական ընտրությունների արդյունքների չեղարկման մասին դիմումը
Քաղաքականություն
22.05.2025 | 20:27
Ռումինիայի Սահմանադրական դատարանը մերժել է ծայրահեղ աջակողմյան «Ռումինացիների միավորման դաշինք» կուսակցության նախագահի թեկնածու Ջորջ Սիմիոնի բողոքը, որը պահանջում էր չեղյալ ճանաչել նախագահական ընտրությունների երկրորդ փուլի արդյունքները։
«Քննարկումից հետո Սահմանադրական դատարանը միաձայն մերժել է ընտրությունների արդյունքները չեղարկելու դիմումը։ Որոշումը վերջնական է և կհաղորդվի Կենտրոնական ընտրական բյուրոյին»,- ասվում է դատարանի հայտարարության մեջ։
Սիմիոնը X-ի իր միկրոբլոգում մեկնաբանել է դատարանի որոշումը․ «Սահմանադրական դատարանը շարունակել է պետական հեղաշրջումը՝ մերժելով մեր բողոքը։ Մեզ մնում է միայն շարունակել պայքարը»։
Նշենք, որ Ռումինիայում նախագահական ընտրությունների երկրորդ փուլը տեղի է ունեցել մայիսի 18-ին։ Սիմիոնը պարտվել է իր մրցակից՝ Բուխարեստի քաղաքապետ Նիկուշոր Դանին, որը ստացել է շուրջ 54% ձայն, իսկ Սիմիոնը՝ 46%։ Հատկանշական է, որ քվեարկության արդյունքներն ամփոփելուց հետո Սիմիոնն ընդունել էր պարտությունը։
Հետագայում, սակայն, նա դիմել էր Սահմանադրական դատարան՝ պահանջելով չեղարկել արդյունքները, այն բանից հետո, երբ Telegram-ի հիմնադիր Պավել Դուրովը հայտարարել էր, թե Ֆրանսիան պահանջել է, որ Telegram-ը «լռեցնի պահպանողական ձայները» Ռումինիայում։
Թարգմանությունը՝ Էմմա Չոբանյանի
