Էրդողանը հայտարարել է, թե հետաքրքրված չէ վերընտրմամբ

Հունգարիայում կայացած Թյուրքական պետությունների կազմակերպության գագաթնաժողովից վերադառնալուց հետո հրավիրված ասուլիսի ժամանակ Թուրքիայի նախագահ Ռեջեփ Թայիփ Էրդողանը ներկայացրել է «հակաահաբեկչական ջանքերի» և երկրում սահմանադրական բարեփոխումների ոլորտում նշանակալի զարգացումները։ Պատասխանելով իր հերթական վերընտրության հնարավորության մասին հարցին՝ նա նշել է, որ «որևէ պատճառ չունի ևս մեկ ժամկետով վերընտրվելու համար»։

«Մենք նոր սահմանադրությունն ուզում ենք ոչ թե մեզ համար, այլ մեր երկրի համար։ Ինձ չի հետաքրքրում վերընտրությունը կամ կրկին առաջադրվելը։ Մեր մտահոգությունն այն է, թե ինչպես կարող ենք բարձրացնել մեր երկրի հեղինակությունը մեր ձեռնարկած քայլերով»,- ասել է Էրդողանը։

Նա հայտարարել է, որ իր ղեկավարած իշխող «Արդարություն և զարգացում» կուսակցությունը պատրաստում է նոր Սահմանադրության առաջարկներ՝ փոխարինելու Թուրքիայի ներկայիս մայր օրենքը, որը մշակվել է 1980 թվականի ռազմական հեղաշրջումից հետո: Նա գլխավոր ընդդիմադիր Ժողովրդահանրապետական կուսակցությանը (CHP) հրավիրել է մասնակցել գործընթացին:

Էրդողանն ասել է, որ Սահմանադրության առաջին չորս հոդվածները, որոնք սահմանում են Թուրքիայի Հանրապետության հիմնարար բնութագրերը, փոփոխության ենթակա չեն։ Նա նաև հաստատել է, որ Քուրդիստանի  աշխատավորական կուսակցությունը (PKK) որոշում է կայացրել զենքը վայր դնելու և լուծարվելու մասին, ինչը կարող է հանգեցնել տասնամյակներ տևած հակամարտության հնարավոր ավարտին։ Ըստ նրա՝ դա պետք է վերաբերվի նաև Սիրիայում խմբավորման ճյուղին։ Ըստ Թուրքիայի նախագահի՝ առաջիկա օրերը շատ կարևոր են։

«Մեր համապատասխան հաստատությունները և նրանց գործընկերները հետևում են բոլոր զինված խմբավորումները սիրիական բանակում ընդգրկելու գործընթացին։ Մենք շատ ուշադիր հետևում ենք YPG-ի հարցին։ Կարևոր է, որ Դամասկոսի վարչակազմը չշեղվի այս հարցից»,- ասել է  Էրդողանը՝ ընդգծելով Սիրիայի հյուսիսում YPG-ի հարցի լուծմանն ուղղված շարունակական ջանքերը։

Հիշեցնենք, որ մայիսի 12-ին PKK-ն հայտարարել էր ինքնալուծարման և զինաթափման մասին։

Թարգմանությունը՝ Էմմա Չոբանյանի