29.04.2026 | 19:27
Կհայտարարվի «Մշակութային վերջին զանգ» մրցույթը, կխստացվի դրամահավաքների արգելքը. ԿԳՄՍՆ
Արգենտինայում ջրհեղեղի պատճառով տարհանվել է ավելի քան 7500 մարդ
Քաղաքականություն
18.05.2025 | 18:53
Արգենտինայի արևելքում՝ Բուենոս Այրես նահանգում, արդեն երրորդ օրն է, ինչ շարունակվում են ջրհեղեղները, որոնք առաջացել են ուժեղ անձրևներից։ Պաշտոնյաների խոսքով՝ կիրակի՝ մայիսի 18-ի դրությամբ, տարածաշրջանում մեկ քառակուսի մետրի վրա մինչև 400 մմ տեղումներ էին տեղացել, մինչդեռ ամսական միջին ցուցանիշը 45 մմ է։ Օդերևութաբանները կանխատեսում են շարունակական ուժեղ անձրևներ և փոթորկային ուժգնությամբ քամիներ, հաղորդում է AFP-ն։
Տեղական իշխանությունների տվյալներով՝ ավելի քան 7500 մարդ արդեն տարհանվել է։ Փրկարարական աշխատանքներին մասնակցում են մոտ 300 հրշեջներ, քաղաքացիական պաշտպանության ուժեր և ոստիկաններ։
Աղետից տուժել են նաև Կամպանա և Սարատե միջին չափի քաղաքները։ Բացի այդ, Բուենոս Այրեսի որոշ արվարձաններ, մայրուղիներ և գյուղատնտեսական հողեր ջրի տակ են անցել։ Կամպանայում մի քանի ընտանիք գիշերվա մի մասն անցկացրել է իրենց տների տանիքներին։ 44 ուղևոր տեղափոխող ավտոբուսը ավելի քան 10 ժամ կանգնած է եղել մայրաքաղաքը երկրի ներքին հատվածի հետ կապող ճանապարհներից մեկում, գրում է AP գործակալությունը։
Բուենոս Այրեսի նահանգապետ Ակսել Կիսիլոֆը հայտարարել է, որ եղանակային աղետալի անոմալիան պայմանավորված է կլիմայի փոփոխությամբ։
Մարտի սկզբին Բուենոս Այրես նահանգի հարավում գտնվող Բահիա Բլանկա քաղաքում տեղի ունեցած ջրհեղեղի հետևանքով զոհվել է 18 մարդ, իսկ ավելի քան 1400-ը ստիպված է եղել տարհանվել։ Այս բնակավայրում մոտ 300 մմ տեղումներ են տեղացել մեկ օրից էլ պակաս ժամանակահատվածում։
