24.06.2026 | 18:23
AI լուծումներ, աշխարհագրության ընդլայնում և շատ ավելին. Eventhub-ի նոր հնարավորություններն ու առաջարկները
Զելենսկիի և Պուտինի հանդիպում, «1000-ը 1000-ի դիմաց» գերիների փոխանակում․ ինչ է համաձայնեցվել ռուս-ուկրաինական բանակցություններում
Քաղաքականություն
16.05.2025 | 19:46
Մայիսի 16-ին Ստամբուլում կայացած հանդիպման ժամանակ ուկրաինական և ռուսական պատվիրակությունները քննարկել են Ուկրաինայի նախագահ Վլադիմիր Զելենսկիի և Ռուսաստանի նախագահ Վլադիմիր Պուտինի հնարավոր հանդիպումը։ ՌԲԿ Ուկրաինայի հաղորդմամբ՝ այս մասին լրագրողներին հայտնել է Ուկրաինայի պաշտպանության նախարար Ռուստեմ Ումերովը, որը հանդիպմանը գլխավորել է ուկրաինական պատվիրակությունը։
«[Զելենսկիի և Պուտինի հանդիպումը – խմբ.] նույնպես քննարկվել է, մենք դրա վրա աշխատում ենք»,- ասել է Ումերովը։
Նա հավելել է, որ շուտով կհայտարարեն հնարավոր նոր բանակցությունների մասին։
Բացի այդ, ըստ Ումերովի՝ Ստամբուլում բանակցությունների ժամանակ կողմերը համաձայնության են եկել գերիների փոխանակել՝ «1000-ը 1000-ի դիմաց» ձևաչափով։ Պաշտոնյան ասել է, որ Մոսկվան ու Կիևը համաձայնության են եկել հստակ ամսաթվի շուրջ, բայց հրաժարվել է հայտնել լրագրողներին։
Ումերովը պարզաբանել է, որ իր գլխավորած պատվիրակությունն Ուկրաինայի նախագահ Վլադիմիր Զելենսկիից ստացել է գերիների փոխանակման հարցը քննարկելու մանդատ։ Գերիների փոխանակումը կլինի ամենամեծը պատերազմի սկզբից ի վեր։
Ռուսաստանը և Ուկրաինան Ստամբուլում համաձայնության են եկել ներկայացնել «հնարավոր ապագա հրադադարի» իրենց տեսլականը։ Այս մասին էլ բանակցություններից հետո հայտարարել է ռուսական պատվիրակության ղեկավար Վլադիմիր Մեդինսկին, փոխանցում են ռուսական լրատվամիջոցները։
«Մենք պայմանավորվել ենք, որ կողմերից յուրաքանչյուրը կներկայացնի իր տեսլականը հնարավոր ապագա հրադադարի վերաբերյալ և այն մանրամասն գրի։ Նման տեսլականի ներկայացումից հետո, կարծում ենք, նպատակահարմար կլինի շարունակել մեր բանակցությունները»,- նշել է Մեդինսկին։
Նա նաև հաստատել է, որ կողմերը համաձայնության են եկել առաջիկա օրերին ռազմագերիների փոխանակում իրականացնել «1000-ը 1000-ի դիմաց» բանաձևով։
Բացի այդ, Ուկրաինան խնդրել է պետությունների ղեկավարների միջև ուղիղ բանակցություններ անցկացնել։
«Մենք հաշվի ենք առել այս խնդրանքը։ Ընդհանուր առմամբ, մենք գոհ ենք արդյունքից և պատրաստ ենք արունակել շփումները»,- նշել է Մեդինսկին։
Հիշեցնենք, որ Ռուսաստանի և Ուկրաինայի պատվիրակությունների միջև 2022 թվականից ի վեր առաջին ուղիղ բանակցությունները տեղի են ունեցել այսօր՝ Ստամբուլի Դոլմաբահչե պալատում։ Հանդիպումը տևել է գրեթե երկու ժամ։
Թարգմանությունը՝ Էմմա Չոբանյանի
